Meeqqat mitaarfissiornermi atikkersorsimasut ullumi naapissinnaavasi
Kunngit pingasut ulluanni mitaartarneq nunatsinni amerlasuunit nuannarineqarluartarpoq.
Nunatta Katersugaasivia Allagaaqarfialu naapertorlugu Euromami assingusunik ileqqoqarpoq, nunatsinnili ileqqoq piffissap ingerlanerani immikkoorluinnartumik "ersinartunngoriartorsimavoq".
Ileqqorineqartoq Mitaartunik taaneqartarpoq, naallu nunap immikkoortuani ileqqup qanoq atorneqartarnera assigiinngikkaluartoq tamanna nunatsinni sumiiffinni tamani takussaalluarpoq. Sumiiffiit ilaanni kunngit pingasuni mitaartoqartarpoq, sumiiffinnilu allani ukiutoqqamit januaarip arfernata tungaanut mitaartoqartarluni.
Pele Kleemann Upernavimmi Sunngiffimmi Pinaveersaartitsinermilu atorfillip Upernarvimmi ileqqoq suli attanneqartoq, taamaakkaluartorli meeraanerusut atisalersortartut oqaatigaa.
- Ulluunerani meeqqat mitaarnerusarput, maani Upernavimmi 200-300-t missaanni meeqqanik atuartoqarpoq, tamarmilli mitaarneq ajorput. Unnukkiartorneranili inersimasut mitaartut takussaanerulertarput, Pele Kleemann oqarpoq.
Taanna 1980-ikkut naalerneranni meeraavoq taamanikkullu mitaartut amerlanerusarsimagaluarput.
- Siusinnerusukkut uagut meeraanitta nalaani mitaartoqarnerusaraluarpoq.
Ukiuunerani taartumi qiimmassaataasoq
Nunatta kujataani mitaartartut aamma ikilisimapput. Tamanna Nanortalimmi sunngiffimmi aqutsisup, Samuel Simonsenip oqaatigaa:
- Ukiuni kingullerni killilerujussuarmik atorneqarpoq taamaakkaluartorli Meeqqat Inuusuttuaqqallu ornittagaanni Kunngit pingasuni mitaartarneq ileqquuvoq, Samuel Simonsen oqarpoq.
Samuel Simonsenip mitaartut ukiup taarseruttornerani qiimmassaataalluartarsoraa.
Taanna siorna mitaartumit iserfigineqarpoq, taassumali kina isersimanersoq ulloq manna tikillugu suli paasinngilaa.
- Ukiup taarnerpaaffiata nalaani seqerngup qummut aallariartornerani immitsinnut aliikkusersoqatigiittarnissarput pisariaqartarpoq illalaartariaqarpugut qungujulaartariaqarlutalu. Mitaarneq kulturitsinnut immikkuullarequtigaarput eriagisassatullu isigisariaqarparput, Samuel Simonsen oqarpoq.
AAMMA ATUARUK Mitaartut konkurrence i Taseralik
Nunatta kitaani Tunumi Tasiilami Mitaartut suli ileqquulluarpoq, amerlasuullu peqataaffigilluartarpaat. Kunngit pingasuni eqaarsaartarfimmi ukiut tamaasa mitaallaqqinnerpaaniartoqartarpoq.
- Pilersaarutigut malillugit timersortartut ulluat jannuaarip arfernani timersortarfimmi malunnartinneqalerpat ualikkut pingasut qeqqata missaani mitaallaqqinneqqusaatitsissaagut, meeqqat immikkut pinnatassaqassapput aammalu inersimasut immikkut pinnatassaqassallutik taakkunannga mitaallaqqinnerpaat pingasut immikkut tamarmik toqqarneqarumaarput, Gert Ignatiussen Tasiilami Peqqinnermut, Sunngiffimmut Kulturimullu aqutsisoq oqarpoq, nangillunilu:
- Ileqqoq taanna nuannerpoq, jannuaarip arfernat qangalili maani ileqquuvoq qujanartumillu suli maani nuannarineqarluni atuuppoq.
