Umiarsuit takornariartaatit tikissinnaaleqqipput: Takornariartitsisartoq nuannaaqaaq

Umiarsuit takornariartaatit nunatsinnukarsinnaanerannut killilersuutit marlunngornermit atuukkunnaassapput.

Tamanna Naalakkersuisut pingasunngornermi tusagassiortunik katersortitsineranni saqqummiunneqarpoq. Naalakkersuisut katersortitsinermi coronamut killiffik pillugu saqqummiillutillu umiarsuarnut takornariartaatinut killilersuutit qasukkarpaat.

Tamanna inuussutissarsiornermut naalakkersuisup, Pele Brobergip (Naleraq) oqaatigaa:

- Naalakkersuisuniit corona pillugu killilersuutit qasukkaamiallatseqqissinnaaleratsigit nuannaarutigisorujussuuarput. Taamatut qasukkaaneq nunatsinni takornariaqarnermut isumaqartorujussuuvoq, maanna umiarsuit sinersorlutik takornariartitsisartut nunatsinnut tikeqqissinnaalerlutik ammaanneqartussanngormata. Aamma tamatuma kingunerisaanik nunatsinni takornariartitsisarnermik inuussutissarsiuteqartut nunanit allaniit takornarianik tikisitsinissamut pilersaarusiorsinnaalerput.

AAMMA ATUARUK Corona pillugu malittarisassaq atorunnaartoq: Umiarsuit takornariartaatit nunatsinnut tikissinnaaqqilersut

Tamannalu takornariartitsisartumit, Greenland Cruiesesimik piginnittumit, Ivik Knudsen Ostermannimit nuannaarutigineqarpoq.

- Nuannerluinnarpoq. Nilliarusukkaluarpungaluunniit paggaa.

- Inniminniisunik allattuivipput ulikkaareerpoq. Sullittakkakka attavigissavakka oqarfigalugillu killilersuutaaruttugut, nunatsinnukarsinnalernertik nuannaarutigissaqaat, Ivik Knudsen Ostermann KNR-imut oqarpoq.

AAMMA ATUARUK Piumasaqaatit nutaat takornariartaassuarnik takornariaqarnermut ajalusoortitseratartut

Killilersuisoqarnerata nalaani umiarsuit takornariartaatit 370-it ukioq manna nunatsinnukarniarnertik nalunaarutigaat. Killilersuisoqarmalli pilersaarusiornissaq ajornakusoorsimavoq, maannali killersuutit atuukkunnaarmata takornarialerisut eqqasuuteqaratik pilersaarusiorsinnaanngorput.

- Umiarsuit takornariartaatit amerlasuut tikinnissaat naatsorsuutigaara. Ilaasorpassuillu nuannaartut. Taamaammat nunatta kusanartup nittarsaannissaaa qilanaareqaara, nuanneq, takornariartitsivimmik Greenland Cruisesimik piginnittoq, Ivik Knudsen Ostermann KNR-imut oqarpoq.

Akiuussuserneqarsimanissamut kisimi piumasaqaateqartoq

Umiarsuit takornariartaatit nunatsinnut tikissinnaassagunik ulluni 14-ini mattusimaqqaarsimanissaat maannamut piumasaqaataasimagaluarpoq. Tassa imaappoq umiarsuaq nunani allani, Savalimmiuni Danmarkimilu talinngasimassanngilaq.

Nunatsinni najugaqanngitsut nunatsinnullu takornariarniartut marloriarlutik kapitissimanissaat maanna kisimi piumasaqaataalerpoq. Killilersuut taanna sivitsorneqarlunilu juunip ulluisa aappaanut atortussanngortinneqarpoq.

Tamanna peqqissutsimut naalakkersuisup, Kirsten L. Fenckerip (Naleraq) nassuiaatigaa:

- Inuiaqatigiinni pissutsit nalinginnaasut qanilleqqissinnaaleratsigit nuannaarpunga, kisiannili tikittussat, nunatsinni najugaqanngitsut akiuussuserneqarsimanissaannut piumasaqaat atuutsiinnarneqassasoq aalajangerpugut. Naalakkersuisut aalajangerput, killilersuinerni qasukkaaffissap kingulliup atuutsinneqalernissaata isumannarunnaarneranik peqqissutsimik suliallit naliliinissaasa tungaanut akiuussuserneqarsimanissamut piumasaqaat sivitsorneqassasoq, Kirsten L. Fencker oqarpoq, nangillunilu:

- Erseqqissaatigissavara, killilersuutinik atorunnaarsitsisarnerput coronap nunarsuarmi tuniluunnerata qaangiunneranik isumaqanngimmat. Suli tuniluuttoqarpoq, aammalu ineriartorneq suli nakkutigaarput, pisariaqalissappallu killilersuinernik atuutsitseqqilernissamut piareersimavugut.