Umimmak piaraq Kangerlussuarmiittoq toquvoq
Umimmak piaraq Kangerlussuarmiittoq tusagassiuutitigut inuillu attaveqatigiittarfiisigut eqqartorneqarsimaqisoq toquvoq.
Taanna arfininngormat toqusoq, Qeqqata kommuniani nunatanik nakkutilliisoq, Christian Pihlblad Jerimiassen KNR-imut uppernarsaavoq.
- Tassa umimmak piaraq nammineerluni arfininngormat toquvoq, taanna uppernarsarsinnaavara, taanna oqarpoq.
Umimmak piaraq qaammatit kingulliit sisamat Kangerlussuup nunaqarfittaani angalaartuarsinnaarpoq.
Taanna qaammatinik qulingiluanik utoqqaassuseqarpoq. Innuttaasunit alutorsaatigineqaqisup anaanaa aallaasoorneqarsimasoq ilimagineqarpoq.
Umimmak piaraq ilaatigut “Musku”-mik taaguuteqartinneqartoq, Danmarkimi uumasuusivimmiit piumaneqartoq ilaatigut innuttaasut oqaatiginikuuaat.
Tassunga tunngatillugu aalisarnermut piniarnermullu naalakkersuisoqarfik KNR-imut uppernarsaavoq, nunatsinniit uumasunik annissisinnanissamut tunngatillugu inatsisinik misissuisoqarmat oqaaseqarsinnaanngikkallarlutik.
Umimmak piaraq uumasut nakorsaannit nakkutigineqarpoq, akiuussuserneqarlunilu
nerisinneqartarpoq.
KNR-ip Facebookkimi quppernerani innuttaasut assigiinngitsunik oqaasertaliiffigineqarpoq, innuttaasut ilaasa piaraq toqunneqassasoq, ovnikkullu siariarlugu naatsiialerlugu mamaqisoq, allappoq.
Inuit isumaat assigiinngitsut
Innuttaasut ilaasa takornariat Kangerlussuarmut takornariagassaattut Kangerlussuarmiitinneqaannassasoq kissaatigaat - kiattunukaannagulu nillertumiitinneqassasoq.
" Danmarki kiappallaarpoq, uumasuusivimmut uumasut inaannut mattunneqarnissaa peqqinnanngilaq. Umimmaqataasa akornaniitiinnarli" ataaseq allappoq.
"Nej, Nej! Hallooo, den tilhører ikke i varme-land, den hører til i et koldt land! Hvorfor skal den flytte til dk!? Han har familie! Han er ikke alene", skrev en anden.
