Naluttartut inuusuttut juullip nalaani Nuummi rekordiliisut

Naluttartut Team Nanoq-mi ilaasortaq qulit 15-illu akornanni ukiullit juullip ulluini naluttarfimmiipput.

Inuppassuit angerlarsimaffimmi katerisimaarlutik juullisiorneranni, Nuummi naluttartut naluttarfimmi sungiusarput.

Naluttartut Islandimi Reykjavikimi januaarip naalernerani unammiarnissaminnut piareersarput. Sungiusartut arlallit juullip ulluani siullermi unamminermi Kalaallit Nunaani rekordiliipput.

Nuummi naluttartut peqatigiiffiat tusagassiuutinut taama nalunaarteqarpoq.

Nalullammaat Danmarkimeersut Tobias Bjerg arnaatinilu Camilla Taylor Nuummut juullisioriarnerminni naluttartunik sungiusaapput.

Inuusuttut sungiusarnissaminnut ullaaralaakkut nalukkiartarput, angerlarlutik eqqissisimaariarlutik unnukkut nalukkiaqqittarlutik.

Rekordiliinerit arlallit

Juullerujussuup unnukkuani  ilaquttat kammalaatillu Nuummi naluttarfimmi Malimmi kateripput, nalunnermilu tallimaniit 50-it tikillugu ukiullit unammisinneqarlutik.

Inuusuttut naluttartut tallimat nunatsinni rekordiliipput.

15-inik ukiulik Sissu Petersen rekordit marluk qaangerpai 100 miterimi brystsvømningimi 1:11:26 200 miterimilu 2:35:94-imik ajugaalluni.

13-inik ukiulik Mathilda Markussen rygsvømningimi aamma rekordit marluk qaangerlugit 100 miterimi 1:16:61 200 miterimilu 2:43:14.

Kingullerlu rekordiliisoq 13-inik ukiulik Adam Tetzchner naloriaatsimik butterflymik 2:46:75-imik rekordiliivoq.

Naluttartut qulit ataallugit ukiullit naloriaatsini assigiinngitsuni tamanit ujaminnapput.

Nalunnermi sungiusarneq ukiortaap tungaanut ingerlanneqassaaq.