Upernavimmi asfalti upernaakkut katagartartoq

Illoqarfik Upernavik sivingajaarsuuvoq. Upernarnissaalu Tusassimi sulisunut qilanaarnarpallaaneq ajorpoq. Asfaltimi aqqusinermiittussaagaluartoq upernarnerit taamaasa aput aakkaagat kooqataasarpoq.

- Støvlitsinnut skotsinnullu nippussuuttarpoq. Taassuma kingunerisaanik illup iluanut natermut nuuttarluni.

Pauline Lennert Kristiansen, Tusass Upernavimmi, inunnit isaaffigineqarluartartumi ulluinnarni aqutsisoq, KNR-mut oqarpoq.

Oliemik piiartaraat

Avannaata Kommuniani teknikkimut ingerlatsivimmit, Upernavimmi asfalterisarneq qangatut, tassa aqqusineq asfaltimik serpalittarlugu ujaraaqqanillu qalletarlugu suliarineqartartoq paasissutissiipput.

Asfalti suliarineqarnermini aqqusinermut nippulluarnissaminut kissassusissaminut pineq ajornera, katagartarneranut peqqutaavoq. Asfaltip nillerpallaartarnera atortulunnermik peqquteqarpoq.

- Qaqorsaatit peersinnaaneq ajorpaat. Taamaattumik lampeolie imaluunniit arlaannik olienik atortulersorluta piiarniarsarisarpagut, Pauline Lennert Kristiansen oqarpoq.

Upernavimmiut ukiuni amerlaasuuni upernaat tamaasa tamanna misigisaramikku sungiutiinnaraat, Tusassimi ulluinnarni aqutsisoq oqarpoq. Taamaammat aqqusernup nueqqaarneranit panernissaata tungaanut Tusassimi iluaqusersorniarsarisarput.

- Nateq plastikkimik qallersortartarput. Suliassartaa annikinnerutinniarsaralugu, Pauline Lennert Kristiansen oqarpoq.

AAMMA ATUARUK Avannaata Kommunia asfaltiliuummik pisiniarpoq

Upernavimmi aqqusernit millionit pingasut atorlugit aasamut suliarineqalerpata pisarneq malillugu serpalittaalluni asfaltiterneqassasut, kommunimi teknikkimut ingerlatsivik paasissutissiivoq.

Avannaata Kommunia asfaltiliuummik illoqarfimmit illoqarfimmut angallanneqarsinnaasumik ukioq manna pisissaaq. Taannali atorneqartigani misilerarneqaqqaassammat qaqugu atulernissaa suli nalunartoq, kommuni aamma paasissutissiivoq.