Upernavimmi innuttaasut akiuussusertinnissamik neqeroorfigineqaqqittalertut
Coronavirusimik tunillatsissimanermiit sapaatit akunnerit sisamat qaangiutereerneranni aatsaat akiuussutissamik kapitittoqarsinnaavoq.
Upernavimmi coronavirus novembari naalersoq ima tuniluutsigaaq peqqinnissaqarfik innuttaasunik misissuisarnerminik unitsitsilluni.
Innuttaasut tamarmik tunillatsissimasumut qanillisimasut taamani nalilerneqarpoq.
Innuttaasulli akiuussusertinnissaminnut maanna neqeroorfigineqarsinnaaqqilerput. Tassami tunillatsissimanermiit sapaatit akunneri sisamat qaangiutereerneranni akiuussuseqqissinnaalertarput.
- Upernavimmi innuttaasut amerlanerpaartaasa tassa qaangereersimalerpaat, taamaammallu neqeroorfigalugit aallartippavut, nunap immikkoortuani avannaani nakorsaq, Peter Vedsted KNR-imut oqarpoq.
AAMMA ATUARUK Upernavimmi killilersuutit arlallit atuuttut
Sulili mianersortoqartariaqarpoq.
- Coronamut ersiuteqaraanni taava soorunami akiuussusertikkiartortoqassanngilaq. Tunillatsissimagaanni akiuussusertittoqarsinnaanngilaq, peqqikkaannili akiuussusertikkiartortoqarsinnaavoq, nakorsaq oqarpoq.
Nunarput tamakkerlugu akiuussusertissimasunit Upernavimmiut amerlanersaallutik akiuussusertissimapput – nunap immikkoortuani avannaani nakorsap, Peter Vedstedip oqarnera naapertorlugu, inuit quliugaangata qulingiluat akiuussusertissimasarput.
Tassa Upernavimmi innuttaasut 500-t 650-illu akornanniittut pingajussaaneerlutik akiuussusersortissapput.
- Nukippassuit atorlugit inuit misissorlugit tunillanneqarsimasut tunillannerqarsimanngitsulluunniit paasiniarnerannit illersorniarlugit akiuussusersuinikkut amerlasuut tunillatsitsaaliornissaat pingaarnerpaasoq isumaqarpugut.
- Ersiuteqalersimagaannilu angerlarsimaffimmi mattunnissaq pitsaanerpaavoq, taamaaliornikkut allat tunillanneqassanngillat, Nunap immikoortuani Avannaani nakorsaq, Peter Vedsted oqarpoq.
