USA-p Rusland peqqarniisaarniartartunik tapersersuisutut naqissuserusunngikkaa

Ruslandip nunatut peqqarniisaarniartartunik tapersersuisutut naqissuserneqarnissaa, Ukrainep piumasaraa. Ruslandilli taamatut naqissuserneqarnissaa kingunipiloqarsinnaasoq, USA-p præsidentia Joe Biden isumaqarpoq Ukrainellu piumasarisaa malikkumanagu.

USA-mi oqartussat marlunngornermi taama ilisimatitsipput.

Rusland Ukrainemi sorsunnermut akisussaasutut nalilerneqassappat peqqarniisaarnianik tapersersuisutut naliliineq aqqutissaanngitsoq, præsidentip illorsuata avammut tusagassiisartua Karine Jean-Pierre oqarpoq.

Taamatut naliliisoqassappat nunamut sorsunnermit eqqorneqarsimaqisumut taassumunnga ikiorsiiniarneq ajornakusoornerulissasoq, taassuma ilanngullugu oqaatigaa.

Rusland peqqarniisaarnianik tapersersuisutut nalilerneqarpat assersuutigalugu ikiuiniaqatigiiffiit suliffeqarfiillu karrinik Ukrainep umiarsualiviinit avammut nioqquteqarniarnerat akornusersorneqassaaq, naak Naalagaaffiit Peqatigiit Tyrkialu tamanna pillugu isumaqatigiissusiornikuugaluartut.

AAMMA ATUARUK Zelenskyj nutaamik atomimik ajunaarnersuaqarsinnaaneranik mianersoqqusivoq

Ruslandip præsidentiata Vladimir Putinip Ukraine ukioq manna februaarimi saassuppaa.

Rusland peqqarniisaarnianik tapersersuisutut USA-mit nalilerneqassappat, tamanna Ruslandip aningaasarsiorneranut kingunipiloqarsinnaavoq. USA-mi nunarsuarmi nunat aningaasarsiorfiunerpaammat, taamalu Ruslandimut kinguneqarsinnaalluni.

Suliffeqarfiit aningaaseriviillu Ruslandimik suleqateqarnermi kinguneranik USA-mit inatsisitigut malersorneqaratarsinnaapput, tamannnalu soorunami pinngitsoortinniarsarissallugu.

Ruslandip peqqarniisaarnianik tapersersuisutut nalilerneqarnissaa, Ukrainep præsidentiata Volodymyr Zelenskij-p nunanut killernut kaammattuutiginikuuaa, sakkutuujunngitsummi amerlasuut Ruslandimit toqutaasimammata.

Rusland nunatut peqqarniisaarnianik tapersersuisutut nalilerniarneraa USA-p præsidentia Joe Biden tusagssiortumit ippassaq ataasinngornermi aperineqarami naaggaarpoq.