USA Issittumi aallartitatut atorfimmik pilersitsiniartoq

USA Issittumi aallartitatut atorfimmik pilersitsiniarpoq.

Ruslandip Kinallu Issittup imartaani najuunnerulerujartuinnarneranni atorfilittatigut sulineq nukittorsarniarneqarpoq. Silammi pissusiata allanngoriartornera ilutigalugu nunat assigiinngit Issittumi najuunnerulerujartuinnarput.

USA-p nunanut allanut tunngasunut ministeria Antony Blinken Issittumi aallartitamik siunissami qaninnermi toqqaanialerpoq, Issittumi nunat assigiinngitsut, nunallu inoqqaavi assigiinngitsut soqutigisaqaqatigiillu toqqaannartumik oqaloqatigineqarsinnaalissallutik.

USA-p nunanut allanut tunngasunut ministereqarfiata oqaaseqartitaa Vedant Patel taama ilisimatitsivoq.

Silap pissusiata allanngoriartornera nunarsuup sinneranut naleqqiullugu Issittumi malugineqangaatsiarpoq. Immakkut angallannermi aqqutissat nutaat periarfissaalerput, nunani tamalaani niueqatigiinnermi sakkutooqarnikkullu periarfissanik nutaanik ammaassilluni.

Rusland Kinalu Issittumi takussaanerujartuinnarput

Rusland Qalasersuup nalaani takussaanerulernikuuvoq, aqqartartut, timmisartut umiarsuillu takussaanerulerlutik, soorlu aamma Kina ilisimatuussutsikkut Issittumi misissuivissanik ammaasimasoq, Kinap Issittumi najuunnerorusunneranik tamanna takutitsinerusoq oqaatigineqartarluni.

Issittumut tunngasuni Kalaallit Nunaanni ullualunni isumaqatigiinniartoqareersorlu Issittumi aallartitassamik toqqaasoqarniarnera saqqummiunneqarpoq.

Rusland Ukrainemik saassussereersorlu Issittumi Siunnersuisoqatigiinni sulineq ukioq manna marsimili unitsikkallarneqarpoq, Ruslandimi Issittumi Siunnersuisoqatigiinni maanna siulittaasuutitaqarpoq.

Issittumi Siunnersuisoqatigiinni sulinerup unitsikkallarneqarnissaa siunnersuisoqatigiinni ilaasortat akornanni Danmarkimit nunaniillu arfinilinnit Rusland avaqqullugu isumaqatigiissutigineqarpoq.

Issittumut tunngasuni ataqatigiissaarisutut atorfik USA-p Issittumi aallartitaata taarsissavaa. Jim DeHart USA-p Issittumi tunngasuni ataqatigiissaarisuatut maannamut issiavoq.

Kina Issittumi aallartitanngussanersoq suli ilisimaneqanngilaq.