USA-mi demokratit senatimi amerlanerussuteqalertut

USA-mi demokratit inatsisartut aappaanni senatimi ukiuni tulliuttuni marlunni suli amerlanerussuteqassapput.

Demokratit sinnerlugit naalagaaffimmi Nevadami qinigassanngortittoq ajugaammat taama pisoqarpoq.

Demokratit sinnerlugit senatori Catherine Cortez Masto Nevadami senatorimut qinersinermi qinigaaqqippoq, unammillertini Adam Laxalt, republikaneriusoq, ajugaaffigalugu.

Mastop ajugaanerata kingunerisaanik demokratit senatimi amerlanerussuteqaqqalaarnertik ukiuni tulliuttuni marlunni attatissavaat.

Nevadami ajugaaneq - Mark Kellyllu taanna sioqqullugu naalagaaffimmi Arizonami ajugaanera pissutaalluni demokratit senatimi 50-inik ilaasortaatitaqalerput. Senatimi ilaasortat katillugit 100-pput.

Taasinernernilu naligiittoqaraangat præsidentip tullersortaata taasinera aalajangiisunngortarpoq. Præsidentip maanna tullersortaa tassaavoq Kamala Harris, demokratiusoq.

Georgiami senatorimut qinersineq suli inerneqannngilaq. Tassani decembarip ulluisa arfernanni aappassaanik, aalajangiisuusussamillu, qinersisoqaqqittussaavoq.
Demokratit tassani ajugaassappata senatimi ilaasortaatitaat 51-inngussapput, republikanerit 49-nik ilaasortaatitaqalerlutik. Demokratit taasinerni taamaasillutik Kamala Harris isumalluutigiunnaassavaat.

Masto 50-inik ukiulik eqqartuussissuserisutut siornatigut sulivoq, Neavadami unnerluussisussaatitaasutut suleriarluni politikkimik aallutaqalerluni.

Nevadami inatsisinik atuutsitsinermut 2006-imi ministerinngorpoq, ministeritullu ukiuni arfineq-pingasuni atorfeqareerluni senatoritut siullerpaamiik 2016-imi sassarluni. Tassani unammillertiminut ajugaaqqalaarpoq.