USA Pituffimmi milliardilikkuutaanik nalilimmik aningaasaliisoq

Pituffimmi kiffartuussinissamik isumaqatigiissut nunatsinni suliffeqarfiup Inuksuk A/S-ip maanna tigussavaat.

Inuksuk A/S nunatsinni suliffeqarfiuvoq, Pituffimmilu aserfallatsaaliuineq ukiuni tulliuttuni aqqaneq-marlunni ingerlattussanngorlugu.
Inuksuk A/S Permagreen Greenlandimit 51 procentimik pigineqarpoq, 49 procentialu Vectrus Services Greenlandimit pigineqarluni.

Amerikamiut sakkutuuisa timmisartortartut, US Air Force, kiffartuussinissamik isumaqatigiissusiorfigineqarput, isumaqatigiissullu 3,95 milliardit dollarinik, imaluunniit 27,7 milliardit koruunit missaannik naleqarluni.

USA, Danmarkimi Kalaallit Nunaannilu naalakkersuisunik ukiorpassuarni suleqateqarpoq, iligiillu ataatsimut illersornissaq, Issittumilu ilisimatusarneq pillugu suleqatigiinnerat attanneqassappat, Pituffiup aserfallatsaalinissaa pingaaruteqartoq, USA-p Danmarkimi aallartitaqarfiata Københavnimit tusagassiutinut nalunaarummi allaaseraa.

Timmisartoqarfimmi ingerlatitsineq, civilingeniøreqarneq, avatangiisinut aqutsineq, inuussutissanut sullissussineq, peqqinnissaqarnermut kiffartuussineq, pilersuineq aammalu orsussaqarnermut ingerlassineq, isertuunneqanngitsumik attaveqaqatigiinneq, talittarfeqarneq, assartuineq, nassiussanik assartuineq, assartuutinut aserfallatsaaliineq innuttaasunullu peqqissaartumik kiffartuussineq isumaqatigiissummi ilaapput.

Kiffartuussinermi suliassat aappaagu aallartissasut

Inuksuk A/S-ip Pituffimmi kiffartuussinermi suliassani aappaagu 2023-p aallartisimalaarnerani aallartissinnaallugit naatsorsuutigaa, tassa ingerlatsinermi suliassat aserfallatsaaliinerillu aallartissallugit, tamakkiisumillu aappaagu oktobarip aallaqqaataani tigussangatillugit.

USA-p, Danmarkip Kalaallit Nunaatalu Pituffimmi kiffartuussinissamik isumaqatigiissut pillugu ukiorpaalunni isumaqatigiinniarerlutik isumaqatigiinniarnerit naammassivaat. Kiffartuussinerit Danmarkimit Kalaallit Nunaanniillu ukiorpassuarni isumagineqarput, kiffartuussissamilli isumaqatigiissut Vectrus Servicesimut 2014-imi tunniunneqarluni.

Tamanna USA-mik isumaqatigiissutinik unioqqutitsinerusoq Kalaallit Nunaata Danmarkillu oqaatigaat, suliariumannittussaarsiuussinissamillu piumasaqaatit nutaat illuatungeriit kingorna isumaqatigiinniutigisimallugit.

Suliariumannittussarsiuussinermi piumasaqaatit nutaat aqqutigalugit, kiffartuussinissamik isumaqatigiissut nutaaq Danmarkip Kalaallit Nunaatalu suliffeqarfiannut maanna taava tunniunneqarpoq.

USA Pituffimmik ingerlatsinermut atatillugu aningaasaliiniartoq, USA-mi oqartussat nakkutilliisoqarfiata nalunaarusiaani allassimasoq, Danmarkimi aviisip Berlingskep ukioq manna maajimi allaaseraa.

Pituffiup ingerlanneqarnerata nutarterneqarnissaa pilersaarutaasoq, USA-p Danmarkimi aallartitaqarfiata Berlingskemut aamma uppernarsarpaa.