USA sorsuffiusumut Ukrainemut 14 milliardit dollarinik nassiussisoq

USA-mi senatip Ukrainemut, maanna russit sakkutuuinik qaartartumeerneqaleruttortumut ikiorsiissuteqangaatsiarnissaq danskit nalunaaqutaat naapertorlugu tallimanngornerup unnuaani akuersissutigaa.

Akuersissuteqartoqarneratigut USA-p 13,6 milliardit dollarit Ukrainemut tunissutigisinnaalerpai. Aningaasat taakku danskit koruuninngorlugit 91 milliardit koruuniupput.

Ikiorsiissutissatummi naatsorsuussat USA-mi inatsisartut aappaanni Innuttaasut sinnerlugit Sinniisoqarfimmit, Repræsentanternes Husimit akuersissutigineqareerpoq.

Ikiorsiissuteqarnissamut siunnersuutip Repræsentanternes Husimi senatimilu akuersissutigineqartoqareermat taanna USA-p præsidentianit Joe Bidenimit atsiorneqaannassaaq, taamaalilluni atuutilersussanngorluni. Tamanna naammassiinnagassatut isigineqarpoq.

1500 milliardit dollarit

Ukrainemiut nunartik pillugu Vladimir Putinimik akiuiniarneranni USA-p ikiorsiissuteqarniarnissamut neriorsuuteqarnera taamaasilluni piviusunngortinneqartoq, USA-mi demokratit senatimi siuttuat Chuck Schumer oqarpoq.

- USA-mi naalakkersuisut Ukrainemut ikiorsiissuteqarniarnerisa marloriaataat sinnerlugit 14 milliardit dollaringajannik inatsisartut maanna akuersissutigineqarput, Chuck Schumer oqarpoq.

AAMMA ATUARUK Ivan Ukrainimeersoq angerlapallakkusuttoq: Anaanaga ataatalu isumannaatsumukassapput

Aningaasat Ukrainemut ikiorsiissuteqarnissamut akuersissutigineqartut, assigiinngitsutigut ikiorsiissuteqarnissamut siunnersuummut ilaapput.

Ikiorsiissutissatummi naatsorsuussat katillugit 1500 milliardit dollariusut ilaminiinnaraat, taakkulu USA-mi sullissivinni assigiinngitsuni atorneqartussatut naatsorsuussaapput.

Eqqaamaneqartussamik tapiissuteqarneq

Ikiorsiissutit USA-p aningaasanut inatsisaata 2022-p naanissaanut missingersuusiorneranni nakkutiginnissinnaatitsipput. Tamatuma saniatigut ikiorsiissuteqarnermi piffissaq sivikitsoq eqqarsaatigalugu USA-p aningaasassaqaannarnissaanut qulakkeerutaasumik aaqqiissuteqartoqarpoq.

Akuersissuteqarneq amerikami politikerit partiivi naapeqatigiiffeqarlutik suli suleqatigiissinnaanerannut uppernarsaataasoq, Det Hvide Husip oqaaseqartartuata, Jen Psakip allakkatigut oqaaseqaammi allappaa.

- Ilaqutariinnut suliffeqarfinnullu akinik appaassaaq, aningaasaqarnitta iluarsiivigeqqinneranut tapertaassaaq amerikamiullu nunarsuarmi siulersuineranik annertusaassalluni.

- Isumalluutit atorlugit eqqaamaneqartuartussamik ukrainemiunut, suli nunaminnik tamallu oqartussaaqataanerannik sorsuuteqartunut tapersiissaagut.