Uummannami innaallagiaqaqqilerpoq, oqarasuaatilli angallattakkat Saattuni suli attavininnatik

Uummannaq sisamanngormat ualikkut nalunaaqutaq marlunut innaallagiaaruppoq, innaallagiaqaqqilernissaalu ullut marluk ulapputigineqarluni.

Maannalu innaallagiaqaqqilersoq Nukissiorfinnit nalunaarutigineqarpoq:

- Illoqarfimmi ippassaq unnukkut nalunaaqutaq qulingiluanut innaallagiaqaqqilerpoq.  Atortussanik kingoraartissanik avataanit pissarsivugut, sulisullu akunnerit 36-t ulappupput, Nukissiorfiit pisortaat Cicilie Senderovitz KNR-imut taama oqaluttuarpoq.

Uummannami qamittoortoqarmat angerlarsimaffippassuit aamma imeqaratillu innaallagiaqanngillat.

AAMMA ATUARUK Uummannami sarfaaruttoorneq peqqutaalluni innaallagiaqaranilu imeqanngitsoq

Taamaalinerani tamanna ilaqurariinnut ajornartoortitsisoq Uummannami najugallip Paaluk Krieutzmannip KNR-imut oqalutttuaraa:

- Qiianarsiartorpugut. Uuminarpoq. Naalungiarsuuteqaratta. Mobiligut battereeruttuulerput qerititsivimmiittuutigullu aakkiartorlutik, Paaluk Kruetzmann Uummannameersoq oqarpoq.

Ikuallanneq pissutaalluni innaallagiaaruteqqittoq

Tallimanngornerup ingerlanerani sarfaaruttoortaqaqattaarpoq.

Siullermik sivikitsumik ullaakkut nalunaaqutaq arfineq-pingasut missaanni.

Tulliani ualikkut nalunaaqutaq marluk missaanni, kingornalu naluanaqutaq arfernup missaani qamittooqqilluni. Generatorimi pujoorfik ikuallalermat Nukissiorfiit innaallagissamik pilersuineq unitsittariaqalerpaat.

- Innaalliagiaaruteqqippoq generatorimi pujoorfik ikuallalersimammat. Taamaattumik innaallagissamik pilersuineq unitsittariaqarluni, Cicilie Senderovitz KNR-imut oqarpoq.

Saattuni oqarusaatit angallattakkat internetilu attaveeruttut

Uummannami sarfaaruttoortoqarnera pissutaalluni Tusass Saattunut attaveqartitsisinnaanngikkallarpoq. Tusass taama nalunaaruteqarluni allappoq.

Saattut attavineqqinnissaa sulissutigineqaleruttorpoq, tamannali pillugu avataaniit ikiorneqarnissaq pisariaqartinneqarmat pissutsit qaqugu nalinginnaasunngoqqissanersut Tusassip oqaatigisinnaanngillarpaa.

- Qulimiguulimmik pissarsiniarsarivugut, teknikerit attaveqaatinik iluarsartuussisinnaasut tikissinnaaniassammata, piaarnerpaamik attavineqqittoqarsinnaaniassammat, Tusassimiit avammut tusagassiisartoq Julie Rademacher KNR-imut oqarpoq.

AAMMA ATUARUK Uummannami Upernavimmilu oqarasuaatit, internetti, raadio tv-lu ajutooqqittut

Innaallagiaarunnerup innuttaasunut kingunerlutsisinera Nukissiorfiit pisortaata Cicilie Senderovitzip ajuusaarutigaa, innaallagiaarunnermullu pissutaasut misissorneqarnissaa nalilersuisoqarnissaalu neriorsuutigalugu.

Pilersuinerulli aalaakkaasunngorteqqinneqarnissaa maannangaaq pingaarnerpaasoq taassuma erseqissaatigaa.