Uummannami tunisassiorfimmi sulisut 30-t angerlartinneqartut

Royal Greenlandip Uummannami tunisassiorfiani sulisut 30-t missaanniittut tunisassiassaqannginnera pissutigalugu ataasinngornermi decembarip 17-iani angerlartiinnarneqarallarput.

Allattoq Simon Uldum

decembarip 18-at 2018 13:56

Aalisartut silap pissutigalugu tunisisinnaasimannginnerat aalisartullu qilalugarniarnerat pissutigalugu tunisassiassaqanngimmat sulisut 30-t allatut ajornartumik angerlartittariaqarlugit, Royal Greenlandip nittartakkamini allaaseraa.

- Naluara qaqugu tunisassioqqilissanerluta, Royal Greenlandip Uummannami tunisassiorfiani ingerlatsisoq, Kirsten Kristensen Worm taama oqarpoq.

AAMMA ATUARUK Ilulissani aalisakkerivimmi sulisut 55-it angerlarartinneqartut

Kirsten Kristensen Worm Royal Greenlandip nittartagaanut oqaluttuarpoq tunisassiassaaleqilertussaallutik siusissukkut ilisimaleramiuk decembarip sisamaanili suliffissarsiuussisarfimmut Majoriamut sulisunik angerlartitsiinnartariaqartussaanertik nalunaarutigisimallugu.

Uummannami Royal Greenlandip tunisassiorfianut aalisartut tuniseqqittalerpata sulisut aggersarneqarumaartut, Kirsten Kristensen Wormip oqaatigaa.

Nutaarsiassami kukkunermik nassaarsimaguit uunga allaffigineqarsinnaavugut.