Uummannap umiarsualiviani arnaq ajunaartoq
Uummannami arnaq 23-nik ukiuliik ullaassaq tallimat missaani ajunaarpoq.
23-nik ukiulik arnaq alla ilagalugu angallammi Uummannap umiarsualivianiitillutik angallataat kinnguvoq.
Politiit ilimagivaat iluliap aserornerata kingorna angallat kinngusimasoq, patsisaasorli suli qulakkeerlugu ilisimanagu, Kalaallit Nunaanni Politiini pigaartut pisortaat Bent Johnsen KNR-imut paasissutissiivoq.
Inuit marluk Uummannap umiarsualiviani immamiinnerat pillugu ullaassaq tallimat qaangilaara politiit nalunaarfigineqarput
Immamiittup aappaa qaqisinnaasimavoq, arnarli 23-nik ukiulik ajunaarluni.
- Pingaaruteqarpoq oqaatigissallugu Karrat kangerluanut tunngassuteqanngimmat, politiini pigaartoq Bent Johnsen KNR-imut taama oqarpoq.
2017-mi Karrat kangerluani tassaarsuaqarpoq, ullaassarli pisoq tassaarsuaqarneranit aallaaveqarnissaa aarleqqutiginessaqanngitsoq politiit erseqqissaapput.
