Video: Avannaata Qimussersuaaraani ajugaasoq aqqutaani sanngusooraluarluni uteriaqqipallattariaqarsimavoq
Qasigiannguani pingasunngormat Avannaata Qimussersuaaraqarnerani, Iluliarmiu Qillaq Hermarij ajugaavoq.
KNR-ip Avannaata Qimussersuaaraa qimuttuilu unamminerup kingorna ilungersoreersimallutik qasuersartut pingasunngornermi naapippai.
Qimussersuaaqqat katillugit 13-it ippassaq aallarmata Qillaq assiliiveqarpoq.
- Aallaratta 1-iugama taava qummukareerluta sangusoorama.
Uteriartussanngorlutimmi Qillap qimmii allamut sangupput kinngugaluarlunilu. Illerngilli ateqqipallappai.
- Taava ingerlaqqikkama 2-nngorama, sisulerluta et-inngoqqikkama aamma nakkutilliisunut sangusooqqikkama, taava ingerlaqqikkama et-inngoqqippunga.
Qillaq sisamanik ukioqarlunili angunni qimusseraangat ilagisarsimallugu oqaluttuarpoq. Ukuli angaaqqiimi qimmii atorlugit piffissami sivikitsumi Avannaata Qimussersuaaraanut sungiusarpoq.
Qanoruumit TV-kkut ilanngutassiaq qulaani isiginnaaruk.
