Video: Tammajuitsussarsiniartarfiup takornariaqarnerulernera malugigaa

Nuup qeqqaniittoq pisiniarfik Qiviut takornarianik amigaateqanngilaq.

- Pisiniarfik inoqaannaavippoq, pisiniaqaannaavippoq, ulikkaaqqaannaavippugut tunisagullu amerlerujussuarlutik, Qiviuni pisiniartitsisoq Torben Lyberth oqarpoq.

Takornariat kalaalerpaluttunik assigiinngitsunik Qiviumut tammajuitsussarsiniartarput.

- Soorlu ilaqutariit iserunik pisiarerusunnerusarpaat mikisualuit piareeriikkat tunisussutissaqqissinnaasut, aammali ilaasa puisip amiinik sanaat pisiarisarpaat. Puisimmi amia issittumut ilisarnaataalluartuummat pisiarerusuttaqaat, Torben Lyberth oqarpoq.

Umiarsuarsuit takornariartaatit piffissami aggersumi suli takussaassapput, takornariartaatimmi umiarsuarsuit 50-t missaaniittut taakkunanilu ilaasut 20.000-t missaanniittut nunatsinnut suli tikerassasut, umiarsualiviuteqatigiiffiup Sikuki Nuuk Habourip naatsorsuutigaa.

AAMMA ATUARUK Umiarsuit takornariartaatit tulattussat aatsaat taama amerlatigisut

Sanaluttartullumi takornariarpassuarnut tuniniagassaminnik aamma ulapputeqarrapput.

KNR sanaluttarfimmut Ajakkamut iserpoq, sanaluttartorlu Samuel Korneliussen naapillugu:

- Nuanneqaaq. Ulapputeqalaarluni nuannersorujussuuvoq, Samuel Korneliussen oqarpoq.

Taanna pillugu Qanoruup ilanngutassiaa qulaani isiginnaarsinnaavat.