WHO: Angreb mod hospitaler i Ukraine stiger dagligt

Ukrainemi peqqinnissaqarfiup illuutai saassunneqartut ullut tamaasa amerliartuinnarput.

Naalagaaffiit Peqatigiit peqqinnissakkut suleqatigiiffiat WHO arfininngornermi taama ilisimatitsivoq. Tuluit tv-qarfissuat BBC taama allappoq.

Napparsimmaviit, ambulancit nakorsallu, Ukraine qaammatip ataatsip matuma siornatigut saassunneqarmalli 70-eriarlutik saassunneqarsimasut, saassussinerilluunniit amerlanerusinnaasut, WHO-p oqaatigaa.

Peqqinnissaqarfiup pigisaasa saassunneqartarnissaat sorsunnermi atorneqaleraluttuinnartoq WHO-p oqaatigaa.

Ruslandip sakkutuui Ukrainemut februaarip ulluisa 24-anni isaammatali assersuutigalugu napparsimmaviit ambulancillu Ukrainemi saassunneqartut 72-it WHO-p maannamut nalunaarsorsimavai. Inuit ikinnerpaamik 71-it toqutaasimapput, allallu 37-t aqqunartitersimallutik.

Sorsunnermi pinerluuteqarneq

Sakkutuujunngitsut napparsimmaviisa saassunneqartarnerat sorsunnermi pinerluuteqarnertut nalilerneqartarput. Ruslandip sakkutuui sakkutuujunngitsunik saassussineq ajortut, Ruslandip qasseeriarluni
 oqaatigisarpaa.

Peqqinnissaqarfiup pigisaasa saassunneqarnerisigut innuttaasut neriuutaarutsinniarsarineqartut WHO-p ilaatigut oqaatigaa.
WHO-p ikiorsiisarnermut tunngasuni pisortaata Michael Ryanip, tusagassiortunik katersortitsinermi sapaatit-akunnerata massuma ingerlanerani oqaatigaa.

- Peqqinnissaqarfiup pigisaannik taama saassussikulatsigisoqarnera nunarsuaq tamakkerlugu takusimanngisaannarparput, taanna oqarpoq.