Zelenskij-p Rusland atomip nukinganik qunusaarinerarpaa

Ukrainep præsidentiata Volodimir Zelenskij-p tallimanngornermi Rusland “atomip nukinganik qunusaarinerarpaa", russit sakkutuuisa Ukrainemi atomip nukinganik nukissiorfik Zaporizjzja saassummassuk.

- Rusland nunanit tamanit kisiartaalluni atomip nukinganik nukissiorfimik saassussivoq. Oqaluttuarisaanitsinni aatsaat taamaattumik pisoqarpoq – inuup oqaluttuarisaanerani tamarmiusumi,  Zelenskij oqarpoq, isumaqarluni Ruslandip Tjernobyl-imi ajunaarnersuaq “uteqqinniaraa”.

- Europami atomip nukinganik nukissiorfiit annersat ikuallappoq, videomi nalunaarutinik ingerlatitseqqittarfikkut Telegram-ikkut Ukrainemiut siuttuat tallimanngornermi ullaannguaq oqarpoq.

 Tallimanngornermi ullaannguaq qatserisartut ikuallanneq qamippaat, najugaqarfiillu eqqaaniittut inuttaasa qimagutinnissaat pilersaarutigineqanngilaq.

Russit qamussui sorsuutit kissarnermut malussarissunik assiliivinnik atortorissaruteqartut, suut qaavisa kissarnerinik umerneqarsinnaasunik takutitsisartunik, Ukrainemiut siuttuat oqarpoq.

- Kingunerisaanik suna eqqaassiffigissanerlugu nalunngilaat. Piareersareersimavaat, oqarpoq.   

Zaporizjzja, Ukrainep kujammut kangianiittoq, arfinillinnik nukissiuutiteqarpoq. Europami atomik nukinganik nukissiorfiit annersaraat.   

USA-p nukissiuutinut ministeria Jennifer Granholm oqarpoq nukissiorfik saanninik  qajannaatsunik illersorneqartoq, nukissiorfittaalu saassussineq aallartilaaginnartoq qaminneqarsimasut. Ukrainemiut nukissiuutinut ministeria Herman Halusjtsjenko oqaloqatigeerlugu oqarpoq, taannalu saassussinerup nalaani Nato akuliuteqqullugu qinnuigaa.  

– Sakkortunerpaaq atorlugu akuliunneq piumasaraarput – aamma Nato-mit nunanillu sakkunik atomip nukitortunik peqartunit, tallimanngorneq ullaakkut Halusjtsjenko Facebook-imi allappoq nutaarsiassaqartitsivik dpa naapertorlugu.

Nukissiuutinut ministeri oqarpoq Ukrainemiut atomip nukinganik nukissiorfik nunamit aamma silaannarmit saassunneqarsimanerarpaa.

 Ukrainep nunanut allanut ministeria Dmytro Kuleba siunnerusukkut tweeterluni allappoq russit sakkutuui tamanit eqqaassisut. Aarlerisaarutigaa ajunaarneq Tjernobyl-imit quleriaammik ajornerussasoq.