Shanghaimi inuit 2,6 millionit coronap tuniluutileqqinnerani aneqqusaajunnaartut

Kinami illoqarfissuaq Shanghai coronavirusip tuniluuteqqilernera pissutigalugu ilaannakortumik matuvoq, inuppassuillu misissorneqartussanngorput. Shanghaimi innuttaasut 2,6 millionit aneqqusaajunnaarput.

Illoqarfissuaq coronap ajornartoortitsinerani matoqqareerluni sapaatit akunnerata ataatsip matuma siornatigut ammaraluartoq, nutaarsiassaqartitsivik DPA allappoq.

Inuit matusinermi angerlarsimaannaqquneqarput, taamaalinerani Covid-19-imut tallimariarlutik misissorneqassallutik.

- Misissuinermi inernerit katersorneqareerpata ammaassisoqaqqikkumaartoq Shanghaimi oqartussat nalunaartut. Tuluit aviisiisa ilaat The Guardian allappoq. Qaquguli ammaasoqarniarnersoq oqaatigineqanngilaq.

AAMMA ATUARUK Shanghai sivisuumik matoqqatinneqareerluni ammariartortoq

Coronavirusimik tunillatsittueruppat aatsaat ammaasoqarniarpoq.

Kinami oqartussat coronavirus akiorniarlugu pinngitsoorani angerlarsimaannaqqusinerpassuarnik atuutsitsivoq, soorlu aamma inunnik allanut qanillinaveersaartoqarnissaa piumasarineqartoq sapinngisamillu ikittuinnarnut attaveqarnissaq kaammattuutigineqartoq.

Nunani allani, soorlu nunatsinni, akiuussusersuisoqareerpoq, naallu Covid-19 suli inuiaqatigiinni tuniluukkaluartoq ammaaqqittoqarnikuulluni.