Aalisarnermut inatsisissaq kinguaattooqqittoq
Nunatsinni inuussutissarsiutit pingaarnersaasa ilaat, aalisarneq, siunissami qanoq inatsiseqassava? Naalakkersuisut tassunga inatsisissatut siunnersuutissartik, Inatsisartunut aappaagu ukiakkut ataatsimiilerpata saqqummiuttussaagaluarpaat.
Naalakkersuisulli piffissaliussaminni naammassisinnaanatik maanna paasivaat. Tassalu inatsisissap suliarinera kinguaattoorpoq. Tamanna atorfilittat allaffissornermi piffissaqarnerunissaannik ilaatigut peqquteqartoq, Aalisarnermut naalakkersuisoq oqarpoq.
- Namminersorlutik Oqartussani inatsisilerituut piffissaqarluarlutik, suliap annertuup aammalu aningaasarsiornermut attuumassuteqarluinnartup iluamik piffissaqarfigalugu peqqissaarullugu suliarissavaat, Aqqaluaq B. Egede KNR-mut oqarpoq.
Naalakkersuisoq: Piffissaqarnerulerpugut
Atorfilittat allaffissornermi piffissalerneqarnerunerisa saniatigut Naalakkersuisut aalisartut peqatigiiffiinut kattuffiinullu oqaloqateqarnissaminnut aamma piffissaqarnerorusutut, naalakkersuisoq oqarpoq.
Sulineq kinguaattoorpoq. Tamanna suliap naammassinissaanut sivikillisaataanngilaq. Taamaakkaluartoq naalakkersuisup piffissamit sivisunerusumik imminnut tuninertik iluarisimaarpaa.
- Kinguaattoornerup kingunissai tassaapput, suliap piffissaqarluarfigineqarluni ingerlannissaanut periarfissiineq aammalu kukkusoqannginnissaanut, aalisarnermut naalakkersuisoq, Aqqaluaq B. Egede KNR-mut taama oqarpoq.
Aatsaat kinguaattuunngitsoq
Aalisarnermut inatsit 1996-imeersoq ullumikkut atuuppoq. Taanna allanngortinneqaqattaarnikuuvoq.
Inatsisartut aalisarneq pillugu inatsisissamik 2017-imi ukiakkut ataatsimiinermi aamma suliaqarput, taanna siullermeerlugu suliarineqarpoq. Inatsisissap aappassaaneerlugu pingajussaanerlugulu 2018-imi upernaaakkut suliarinissaaa pilersaarutaagaluartoq piviusunngunngitsoorpoq.
Aalisarnermut inatsisissap suliarineqarnera aatsaat kinguaattuulinngilaq. Inatsisissamik suliaqarnermi Aalisarneq pillugu Ataatsimiititaliarsuaq isumaliutissiissusiortinneqarnikuuvoq.Taakkua suliaminnik 2020-mi juunimi naammassinnittussaagaluarlutik ukiaq aatsaat piareerput.
Ataatsimiititaliarsuaq: Aalisakkanik pisassiissutinillu politikerinit pisakinnerugitsi
Ataatsimiititaliarsuup isumaliutissiissutaa assigiinngitsunik politikerinut innersuussuteqarpoq. Innersuussutillu Naalakkersuisunit Inatsisartunillu malinneqassanersut taakku aalajangissavaat.
Aalisarnermullu ataatsimiititaliarsuup meeqqat ernuttattalu aalisarneq inuussutissarsiutigisinnaaniassammassut aalisakkat naammattariaqartut pingaarnertut oqariartuutigaa. Maannakkut ineriartorneq ingerlaannassaguni aalisagartassat ikinnerullutillu aalisartut siunissami iluanaarutikinnerussasut Aalisarnermut ataatsimiititaliarsuup oqaatigaa.
Aalisarnermut ataatsimiititliarsuup umiatsiaararsortut sinerissap qanittuani aalisartut ukkatarineruai. Naalakkersuisummi umiatsiaararsortunut ukiuni kingullerni pisassiissuteqarnerujussuupput.
Assersuutigalugu sinerissap qanittuani aalisarnermut saarullittassiissutit uumassusilerisut 2018-imi innersuussutaannit pingasoriaammik amerlanerusut pisassiissutigaat. Sinerissap qanittuani aalisarnermut qaleralittassiissutit uumassusilerisut 2019-imi innersuussutaanit marloriaatingajammik amerlanerupput.
Pisassiissutillu aalisarneqareeraangata aalisartut suli pisassiissuteqarfigineqarusuttarput.
Poltiikerit pisassiissutinut akulerunnissaat pinaveersaartinniarlugu akuersissuteqarnissamut aqutsisoqarfimmik pilersitsisoqarnissaa ataatsimiititaliarsuup innersuussutigaa. Tassa pisassiissutinik aalisartunullu akuerissutinik tunniussaqartarfik. Tassanilu Naalakkersuisunit politikerinik sulisoqassanngilaq. Tamanna politikkikkut sunniivigineqannginnissaanik qulakkeerinerussaaq.
Aalisakkanik aalisakkanillu nioqqutissianik avammut nioqquteqarneq 5 milliardit koruunit sinnerlugit naleqarput. Tassa avammut nioqqutit 91 procentiisa missaanniipput. Tamatuma saniatigut nunatta karsia aalisakkanut akitsuutinit millionilippassuarnik iluanaaruteqartarpoq.
