Aalisarnermut naalakkersuisoq: Pisassat amerlinerat nuannaarutissaavoq

-Soorunami nuannerpoq misileraanerit ilisimatusarnerillu takutimmassuk aqutsiveqarfinni massakkut marluungallartuni qaleraleqassutsikkut ajortup tungaanut ingerlasoqarani pitsaasup tungaanut aallariartoqarsimasoq. Tamanna tamatsinnut nuannaarutissaavoq.

Siunissamut sunniuteqassaaq

Naalakkersuisut Pinngortitaleriffiup pisassatut innersuussutigisaanit amerlanerusunik ukiuni arlalinni pisassiissarput. Assersuutigalugu Qeqertarsuup Tunuani siorna ukiumut 9028 tonsit, Upernavimmi 8480 tonsit kiisalu Uummannami 9609 tonsit pisarineqarput, taakkualu aappaagumut aappaaguamullu 20 procentimik annerusumik pisasiissutissatut innersuussutaasunit amerlanerupput.

Pinngortitaleriffiup siornamut naleqqiullugu pisassanik amerlanerusunik innersuussinerata aappaagu pisassiinissamut qanoq sunniuteqarnissaa naalakkersuisup suli isummerfigisinnaanngilaa:  

- Tassa ukiuni marlunni aqutsiveqarfinnut taakkununnga innersuussutit qaffapput, taamaammat ukiup tulliani pisassiissutissanik aalajangersaanerup kingorna, aamma tusarniaanerup kingorna ukiup naalivinnerani pisassiissutit qanoq annertutigissanersut taakkua, avammut oqariartuutigiumaarpagut.

Pinngortitaleriffimmiut oqaatigaat qaleraleqatigiit aappaagu aappaaguagulu aalisarneqarsinnaalersussat amerlasoorsuit ataasiinnaasut. Pinngortitaleriffiulli misissuinerata pitsaasup tungaanut ingerlasoqarneranik tikkuussinera Naalakkersuisut siunissami ungasinnerusumi pisassiisarnissaannut sunniuteqassasoq Karl Tobiassen oqarpoq:

- Misissuutitaaqqammivugut - Tarajoq - aamma taanna isumalluarfigaarput, suli paasisat ilisimasallu annertunerulerpata pinngitsoorani ukiuni aggersuni aamma pisassiissutitigut sunniuteqarsinnaasumik suliaqarnissaat neriuutiginartorujusuuvoq.

Qaleralittassat ukioq naatinnagu tamakkerneqarsinnaapput

Ukioq manna qaleralinniarneq ingerlalluarmat qaleralittassat ukioq naatinnagu tamakkerneqarsinnaapput. Tamannalu Naalakkersuisut piareersarfigigaat Karl Tobiassen oqarpoq:

- Kvartalip aappaani pisassanik nunguutsisoqartussaammat ukiup naalerneraniit aallertaqattaarnikuuvugut. Aammalu 2021-mi kvotat (pisassiissutit) pisarinngittuukkat juunip naanerata kingorna naatsorsorneqareeraangata, ukiup sinneranut pisassiissutit qaavinut ilineqartarput, taakkualu juuli naalerpat paasiumaarpagut qanoq annertutigiumaarnersut. Aammalu taakku ukiup sinneranut nalimmassaatitut atorumaarput.

Aalisartut aalisarluarnissaat pisassiissutinik sippuinaversaarnissaminngarnit naalakkersuisup pingaarnerutippaa.

- Uani aalisartunik killilersuisinnaanngilagut sippuisoqannginnissaa anguniarlugu. Namminneq qanoq aalisarnertik ingerlatissallugu aalajangersartussaammassuk.