Aalisartut kattuffii: Ilorraap tungaanut alloriarneruvoq
Qalerallit ukioqatigiit ataatsit amerlasoorujussuit sinerissap qanittuani qaleralinniarfiusartuni siunissami aalisarneqarsinnaalissapput. Uumasorsiuut taamaattumik siunnersuipput aappaagu aappaagualu sinerissamut qanittumi qaleralittassat 20 procentimik qaffanneqassasut.
Tamanna nunatsinni aalisartut piniartullu kattuffiata KNAPK-p siulittaasuata Nikkulaat Jeremiassenip tupaallaatiginngilaa:
-Tupaallaatiginngilakka nammineq. Soorunami peqassuseq paasigamikku, ilaasortatta oqariartuutaat aammalu uagut sukataarutigalugu allannguisoqarnissaanik kissaatigisarput, taama oqitsigisumik allannguinissamik siunertaqarnerat nuannaajallannarlunilu tusarluarnarpoq.
Uumasorsiuut aqutsiveqarfinnik misissuinerisa ersersippaat, aqutsiveqarfiit taakkua 20 %-imik qaleraleqarnerulersimasut.
Uummannalli aqutsiveqarfia qaleraleqarnerulersimanngimmat tamaanga qaleralittassiissutissat allannguuteqannginnissaat innersuussutaavoq.
Uumasorsiuulli qaleralittassatut innersuussutaat, Naalakkersuisut ukiuni kingullerni amerlasuuni malinneq ajorpaat.
Assersuutigalugu Qeqertarsuup Tunuani siorna ukiumut 9028 tonsit, Upernavimmi 8480 tonsit kiisalu Uummannami 9609 tonsit pisarineqarput, taakkualu aappaagu aappaaguamullu innersuussutaasunit amerlanerupput, tamannalu pillugu Nikkulaat Jeremiassen ima naliliivoq:
-Aalisarfigineqarsinnaasut allat aalisarfigineqannginnamik, sualummik Upernaviup avannaatungaa eqqarsaatigalugu pisasiiviunngilaq. aalisartut siammasinnerusumik inissillutik aalisalersinnaanerat eqqarsaatigalugu isumaqarpunga aallariarnerinnaasoq, taamatut paasinnillutik qaffaanissamik siunertaqarnerat.
Ilorraap tungaanut alloriarneq
Qaleralittassiissutissaanik 20 procentimik qaffaanissamik innersuussineq ilorraap tungaanut alloriarnerusoq sinerissap qanittuani aalisartut piniartullu kattuffiata SQAPK-p pisortaa Erik Lange oqarpoq:
- Annertoorsuunngikkaluarput qaffaassutaasussat. Alloriarneruvoq siumut taavalu ukiunut tullernut aamma pisassiissutit taamatut qaffakkiartuaarnissaat soorunami kissaatigineqarpoq, aamma taamatut innersuussisoqartarnissaa ukiuni tullerni kissaatigineqarpoq.
Tamannalu Erik Langep ima tunngaveqartippaa:
-Ukiut kingulliit arlallit massakkut 10 procentimik pisassiissutit appariartuaartinneqarnikuupput, taassumalu kingunerinikuuaa, ukiumut pisasiissutit sipportarnerata annertusiartornera - ukiut tamaasa. Taamatullu innersuussuteqarnerup sippuisarnerup milliartorluni aallartinnissaa - tassa tullinnguutissooq taanna.
