Aaqqissuussisoq: Siumut IA-llu akornanni isumaqatigiissummi tigussaasortaqarpallaanngitsumi maluginiagassat pingasut aajuku
Immikkoortut pingasut tigussaanerupput. Sinneri qulit tigussaavallaanngillat.
Radioaviisimi ukiuni aqqanilinni aaqqissuisuusoq, Jens Thorin taama naliliivoq, taassuma nunatsinni politikki ukiorpassuarni malinnaaffigaa.
- Isumaqatigiissummi immikkut tigussaasortaqarpallaanngilaq, Jens Thorin oqarpoq.
Siumut aamma IA Inatsisartuni atuuffinnut 31-nut 22-nik qinigaatitaqarlutik maanna amerlanerussuteqarput.
Partiit taakku marluk siusinnerusukkut naalakkersuisoqatigiinnikuupput. Tamanna 2016-imit 2018-imut pivoq. Naleraq aamma naalakkersuisoqataavoq
2020-mi qinersisoqarpoq. Naleraq IA-lu naalakkersuisoqatigiinnissamik isumaqatigiissuteqarlutik 31-nit 16-inik qinigaatitaqarput. Atassut partiitut ikorfartortaavoq.
Atassut siorna novembarimi ikorfartortaajunnaarpoq.
Siumut maanna sisamanik Naalakkersuisuutitaqalissaaq. Siumuttaaq Inatsisartuni siulittaasuuffeqassaaq - Naleqqamit Hans Enoksen tassani ullumikkut siulittaasuuvoq.
Naleraq ullumikkumut pingasunik Naalakkersuisuutitaqaraluarpoq.
Jens Thorinillu oqarnera naapertorlugu isumaqatigiissummi immikkoortunik tigussaanngilluinnartoqarpoq. Assersuutigalugu una:
- Inatsisartut inatsisaat atuuttut ataqqillugit, naalakkersuisoqarfinni atuutsinneqarnerisa eqqortumik ingerlanneqarnerat nakkutigissallugit, naalakkersuinikkullu innuttaasut qinersisimanermikkut kissaataat tunngavigalugit ingerlatsisoqartoq nakkutigissallugu qulakkiissallugulu.
- Tamanna qanoq isumaqarpa? Imaappa Inatsisartut inatsisaat ataqqineqarsimanngitsut, imaluunniit naalakkersuisoqarfiit inatsit eqqortumik ingerlassimanngilaat?, aaqqissuisoq aperivoq.
AAMMA ATUARUK Ataatsimut isigalugu: Naalakkersuisut nutaat uku sulissutiginiarpaat
Tigussaasumillu oqaaseqartoqarpoq: Naalakkersuisoqatigiit nutaat atuunneranni uranimik piiaanissamut apeqqut uninngatiinnarneqassaaq.
- Uranimut apeqqut ullumikkut atuuttutut sammiveqartinneqassaaq, apeqqullu allanngortinneqassappat aatsaat inuiaqatigiit taasinermikkut tamanna naqissusissavaat. Taasissutigineqassappallu innutaasut naammattumik illuinnaasiunngitsumillu qaammarsaavigineqarnissat avaqqunneqarsinnaanngilaq.
IA-p Naleqqallu siorna qineqqusaarnermi uranimik piiaasoqarnissaata piviusunngunnginnissaa qineqqusaarutigaat. Qinersisartut tamatumanik tapersiingaatsiarput, ullumikkullu nunatsinni uranimik piiaaneq inerteqqutaalluni.
Siumut piiaanissamut akerliunermut isumaqataanngiinnarpoq. Aamma Demokraatit akerliunngillat.
- Siumut taamaalilluni akuersiinnarpoq, Jens Thorin oqarpoq.
- Siumup uranimik piiaanissamut inerteqquteqarnissamut akerliunermini nunatta kujataani inuussutissarsiornerup ineriartornera unitsinneqarnissaa ilaatigut tunngavilersuutiginikuuaa. Uranimimmi inerteqquteqarneurp Kuannersuarni aatsitassanik qaqutigoortunik uranitalinnik piiaanissaq unitsippaa.
Parisimi isumaqatigiissut pillugu iluatsitaqartoq
Naalakkersuisoqatigiinnissamut isumaqatigiissummi allassimavoq:
- Parisimut isumaqatigiissut inuiaqatigiinnut qanoq sunniuteqassanersoq pillugu misissuiffigeqqissaarneqassaaq, siusinnerpaamillu ukiakkut 2022 Inatsisartunut aalajangiiffigisassanngorlugu tunniunneqassaaq.
Siumut aningaasanut inatsisip siorna isumaqatigiinniutigineqarnerani peqataaniannginniarnikuuvoq, matumanilu Parisimi isumaqatigiissutip isumaqatigiinniarnermi ilaanera pissutaavoq.
Partiip Parisimi isumaqatigiissut nunatsinni inuussutissarsiornermut aningaasaqarnikkullu qanoq kinguneqarnissaa paaserusunnikuuaa. Taamaammat Siumup tamanna isumaqatigiissummut ilannguppaa.
- Siumut uranimut apeqqummut tunngatillugu ajorsarpoq, Parisimulli isumaqatigiissummut atatillugu iluatsitsiffigisaqarluni. Jens Thorin oqarpoq.
AAMMA ATUARUK Siumup siulittaasua: Sapaatit akunnerata naanerani isumaqatiginninnialerpugut
- Nunanut ineriariartorluarsimasunut sanilliulluta mingutsitsinnginnerusunik atuinerput siuarsimavallaanngilaq. Erngup nukinganik nukissiorfeqarpugut. Kisianni assartuussutigut tamarmik motorinik uuliamik atuisunik ingerlapput. Kisianni nunarput qanoq iliussanersoq qanorlu iliussannginnersoq pillugu sammivimmik isumaqatigiissummi allassimasoqanngilaq.
Kalaallit oqaasii
- Kalaallit oqaasii Namminersorlutik Oqartussat ingerlatsineranni salliullutik inissisimassapput, isumaqatigiissummi allassimavoq.
- Politikkip qanoq inissikkumaarnerata takunissaa pissanganassaaq. Ilinniagartuut qitiusumik aqutsisoqarfimmiittut kalaallisut oqaaseqartut amerapput, kisianni pisariaqartitsinermik matussusiinissamut naammanngillat, Jens Thorin oqarpoq.
- Inatsisitigut piareersarnissamut suliaqarnerit annertuut taamaammat danskisut suli suliarineqartarput. Savalimmiormiut qitiusumik aqutsisoqarfimminni assersuutigalugulu tusagassiuutini namminneq oqaatsitik atortarpaat, danskisullu atorneqarpallaaratik. Kisianni savalimmiormiorpassuit aamma ilinniagartuujupput.
- Siumumit kissaatigineqartoq nutaajunngikkuni qangarnisaavoq. Qanorli piviusunngortinneqassanersoq allassimanngilaq.
Aalisarneq pillugu inatsit
Aalisarneqanngitsoq naalakkersuisoqatigiinnissamut isumaqatigiissuteqartoqarsinnaanngilaq. Isumaqatigiissummilu kissaatit uani amigaataaneri kiserngoruttut, Jens Thorin isumaqarpoq.
Isumaqatigiissummi allassimavoq:
- Aalisarneq pillugu inatsisissaq inuiaqatigiit susassaqartullu qanimut suleqatigalugit sulineq nanginneqassaaq naammassineqarlunilu.
Jens Thorinillu oqarnera naapertorlugu tamatuma oqaasertalernera ikkappoq.
- Sumik tunaartaqarluni sulisoqassanersoq oqaasertalernissaa isumatusaarneruvoq. Suna pingaarnerpaava? Uumassusilerituut piujuaannartitsiniarnerat pingaarnersiorneqassava, imaluunniit innuttaasut isertitaat suliffissaqarnissaallu pingaarnerutinneqassappat? Tamanna oqaasertalerneqanngilaq, Jens Thorin oqarpoq.
AAMMA ATUARUK Naalakkersuisoqatigiilersut: Isumaqatigiinngittarsimagaluaqaluta siunissamut piareerpugut
- Siumut IA-lu nunatsinni inuussutissarsiutini pingaarnerpaaq pillugu oqaluttuarisaanermi isumaqatigiinngittuarsimapput. IA-p uumassuseqartut piujuaannartitsiniarnerat pingaartittaraa, Siumup amerlanerusut aningaasarsiornermik inuussutissarsiuteqarsinnaanissaat pingaartittarpaa. Allatut oqaatigalugu: Pisassiissutit tamakkerneqarisa tamaasa nutaanik pisassiissuteqartoqartarpoq, naak tamanna uumassusilerituut innersuussutaannut akerliugaluarttoq.
- Naalakkersuisuisoqatigiit iluanni tamanna isumaqatigiinngissutaassaaq. Aalisarnermut ataatsimiititaliarsuup aalisarnermut inatsisissamut nutamut innersuussutaanik aamma allassimasoqanngilaq. Tamanna arajutsisassaanngilaq. Suliarujussuarmi ingerlavoq, inuussutissarsiutillu ilarujussui innersuussuteqaqataapput. Taamaammat eqqaaneqannginneri eqqarsarnarsinnaapput.
