Aatsaat taama amerlatigisut: 99-it tunillatsissimasut
Coronamik tunillatsissimasut amerleriaqqingaatsiarput: Nuna tamakkerlugu tunillatsissimasut ullumikkut 99-iupput - taakkunannga 68-it Qeqqata Kommunianiipput.
Nunatsinni tunillatsissimasut katillugit ippassaq 86-iupput.
Tunillatsissimasut kommunikkaarlugit ullumikkut ima agguataarsimapput:
- Avannaata Kommunia: 0
- Kommune Qeqertalik: 15-it
- Qeqqata Kommunia: 68-it
- Kommuneqarfik Sermersooq: 13-it
- Kommune Kujalleq: Pingasut
Qeqqata Kommuniani tunillatsissimasut ippassaq 57-iupput.
Illoqarfiit pingaarnersaanni tunillatsissimasut arriitsumik aamma amerliartorput: Nuummi tunillatsissimasut ippassaq 11-upput, Qaqortumi tunillatsissimasut ippassartut amerlatigipput.
Sisimiuni imigassamik nioqquteqarnerup inerteqqutaanera
Sisimiuni sukkasoorujussuarmik maannakkut tuniluuttoqarpoq.
Tunillatsissimasut nutaat 14-it ullup ataatsip kingulliup ingerlanerani paasineqarput. Taakkunannga 11-t Sisimiuniipput, sinnerilu pingasut Aasianniit Nuummut angalaqqammersuullutik.
- Matumani tunillaassuiffiusut ilisimaneqartut ilisimaneqanngitsullu pineqarput. Taamaattumik suli Sisimiuni mianersornissamut tunngavissaqarpoq. Tassalu: Qanillinaveersaarit, errortukulagit katerittullu orninnaveersaakkit, nakorsaaneq Henrik L. Hansen oqarpoq.
Illoqarfiit annersaata tullianut ippassaq kinguneqartitsisoqarpoq: Pisiniarfinni, neriniartarfinni, sutorniartarfinni imerniartarfinnilu imigassamik nioqquteqarsinnaaneq tamarmi erngertumik atuutilersumik ippassaq unitsinneqarpoq.
Imigassamik nioqquteqarsinnaanermut inerteqquteqarneq ataasinngorneq ilanngullugu atuutsinneqassaaq.
AAMMA ATUARUK For mange smittede: Slut med salg af alkohol i Sisimiut
Qeqqata Kommuniani borgmesterip imigassamik nioqquteqarnerup inerteqqutigineqalernissaanut Naalakkersuisunut qinnuteqaateqarpoq, tamanna Naalakkersuisut ippassaq akuersissutigaat. Borgmesterilu ilorrisimaartoq KNR-imit ippassaq oqaloqatigaarput:
- Tassa tamani naluneqanngitsutut piffissami kingullermi Sisimiuni tunillaassuunneq annertummat, aammalu ullut tamaasa nutaanik takkuttoqartarmat. Taavalu amerliartuinnarnerat ernummatigigatsigu. Taavalu weekendi qanillimmat, Malik Berthelsen (Siumut) oqarpoq.
- Nalunartut pillugit weekendimi tunillaassuuttoqaratarsinnaanera pinaveersaartinniarlutigu Naalakkersuisunut noqqaassutigivarput Sisimiuni Sarfannguani Itillimilu imigassat matuneqarallarnissaannik.
Politiit unnuk eqqissisimasoqartoq nalunaarutigaat melder om rolig nat
Politiillu eqqissisimasoqarnissaa neriuutigaat. Unnuaq eqqissisimasoqarpoq, angerlarsimaffinni eqqissiviilliortoqaranilu nangigiaasoqanngilaq, Sisimiuni politiini politikommissær, Karl Jørgen Lennert oqarpoq.
AAMMA ATUARUK Sisimiormiut coronamut malittarisassat pillugit: Qatsunnarsivoq, kisianni...
- Illoqarfimmi angalaarluta takussaassaagut aamma sapaatip akunnerata naanerani. Aamma soorunami Facebooki aqqutigalugu alaatsinaassavarput arlaatigut tuniniaasoqannginnersoq. Tuniluuttoqarnerata unitsinneqarnissaa neriuutigilluinnarparput.
Sisimiuni sukannersumik killilersuisoqarpoq: Inuit amerlanerpaamik sumiiffimmi katersuuteqqusaapput kikkullu tamarmik tamanit ornigarneqarsinnaasuni qanermut assiaquteqaqqusaallutik.
Ilaqutariit tunillatsissimasut Sarfaq Ittummut ilaasut
Tunillatsissimasut ullumikkut kisitsisinut ilaalersut "ilaqutariiupput", taakku sapaatip akunnerani matumani Sarfaq Ittummut ilaasimapput. Tunillatsissimasut Aasianniit umiarsuarmut aggustip arfineq-pingajuani unnukkut ikipput, taakkulu Nuummut marlunngornermi ullaakkut niullutik.
Sinersortaammut piffissami tassani ilaasut ersiutinik maluginiagaqassapput, ersiuteqarnialeriarlutillu misissortikkiartussallutik, Naalakkersuisut paasissutissiipput.
