Sisimiuni tunillatsissimasut amerlavallaarput: Imigassamik nioqquteqarneq unitsinneqarpoq

Sisimiuni niuertarfinni imigassamik nioqquteqarneq erngertumik atuutilersumik unitsinneqarpoq.

Aamma neriniartarfinni, imerniartarfinni, sutorniartarfinni imigassamik pisinissaq periarfissaanavianngilaq.

Naalakkersuisut taama nalunaaruteqarput.

Imigassamik nioqquteqarnerup inerteqqutaanera ataasinngorneq aggustip ulluisa 16-iat ilanngullugu atuutissaaq, tamanna nunaqarfinnut marlunnut Sarfannguanut Itillimullu aamma atuuppoq.

Nunatsinni illoqarfiit annersaata tulliani coronamik tuniluuttoqarnerata unitsikkuminaannera pissutigalugu borgmesteri Malik Berthelsen kommunimilu pisortaaneq Juliane Henningsen imigassamik nioqquteqarnerup unitsikkallarneqarnissaanik Naalakkersuisunut qinnuteqaateqarput.

Sisimiuni tunillatsissimasut maanna 57-iupput – taakkulu ullormiit ullormut amerliartuinnavipput.

Nunarput tamakkerlugu tunillatsissimasut katillugit 86-iupput.

Nakorsaanerup, Henrik L. Hansenip oqarnera naapertorlugu inuusuttut akiuussutissamik kapitinneqanngitsut illoqarfimmi tunillaassuinerupput – tuniluuffiusullu arlaleriillutik. Nakorsaaneqarfik naapertorlugu sumiiffinni ukunaniissimasut ersiutinik maluginiagaqarnerussapput:

• Utoqqarmiut: Tunillatsissimasoq aggustip ulluisa aappaanni pingajuannilu sulisimavoq.
• Pub Raja: Tunillatsissimasoq sulisimavoq imaluunniit tassaniissimalluni juulip ulluisa 31-anni nalunaaqutaq 02-mit 05-imut. Aggustip aallaqqaataani ulluap-qeqqaniit 01.30-p tungaanut aamma aggustip pingajuanni sisamaannilu.
• Imerniartarfik Starlight: Ikinnerpaamik sisamat sulisimanngikkunik imerniartarfissiorsimapput.
• Ilisineq: Tunillatsissimasoq oqaluffimmi kingornalu kaffillernermi aggustip pingajuanni najuuppoq.
• Meeraaqqerivik (ini Sikkertoq): Tunillatsissimasoq tallimanngorneq aggustip arfernanni meeraaqqerivimmiippoq.
• Taxa: Taxartitsisut arlallit tunillatsissimapput.
• Royal Greenland: Tunillatsissimasut juulip 30-anni aggustillu aappaanni sulisimapput.
• Nangigiarnerit: Tunillatsissimasoq juuliup 31-anni aggustillu tallimanni nangiarfinni arlalinni najuussimavoq, taakkunani peqataasut arlallit suli inuttarsineqarnatik.
• Meeqqerivik Naja Aleqa: Tunillatsissimasoq meeqqamik aallertarsimavoq.
• Ulloq unnuarlu paaqqutarinniffik Isikkivik: Tunillatsissimasut tassani arlaliupput. 

Sisimiuni killilersuinerit sukannersut atuutsinneqarput.

Innuit amerlanerpaamik 20-t katereqqusaapput tamanillu ornigarneqarsinnaasuni assersuutigalugu pisiniarfinni, napparsimmavimmi, bussini taxanilu kikkut tamarmik qanermut assiaquteqassallutik.

Neriniartarfimmut imerniartarfimmulluunniit iserniartut tamakkiisumik akiuussutissamik kapitissimasariaqarput imaluunniit coronamik tunillatsissimannginnermut uppernarsaammik sivisunerpaamik akunnernik 48-nik pisoqaassusilimmik takutitsisariaqarlutik.

Malittarisassat taakku aggustip ulluisa 24-annut atuutissapput.

Nunatsinni imigassamik nioqquteqarnermik aatsaat matusisoqanngilaq.

Nunatsinni coronamik tunillatsissimasoqaqqaarmat sumiiffiit ilaanni imigassamik nioqquteqarneq aamma matuneqarpoq. Nioqquteqaqqusinnginneq taanna ulluni 14-ini Nuummut, Kapisilinnut Qeqertarsuatsiaanullu atuuppoq.