Abelsen: Sukkortunut sullissivik peqqinnarnerusumik inooriaaseqalernissamut aqqutissiueqataassaqaaq
- Suleqatigiinnikkut matumuuna nunatsinni peqqinnerulernissamut annertuumik alloriarnissarput qularinngilara, peqqissutsimut naalakkersuisoq Martha Abelsen (S) oqarpoq.
- Sukkornermik, pualluummik KOL-imik aallu naqitsinerata qaffasippallaarneranik nappaateqalersartut ikilisinnissaat neriuutigalugulu upperaara, tusagassiortunut nalunaarummi taanna allappoq.
Novo Nordisk Fonden 382 millionit koruuninik sukkortunut sullissivimmik Nuummiittussamik aningaasaliivoq.
Sukkortut inooriaatsimillu nappaateqarlersimasut katsorsarneqarlutillu nappaataat ilisimatusarfigineqassapput.
Aningaasaliissutit marlunnut avinneqarput. Ilaat sanaartornermut ilaallu sullissiviup ingerlanneqarneranut atorneqassallutik
Sullissivik 2024-mi atoqqaarfissiorneqassaaq.
Sukkortut, anigugassaanngitsumik pualluuteqartut aallu taqqap naqitsineranik qaffasittoortut nunatsinni 6.500-t missaanniipput.
Taakkulu 2030-mi 9.300-nut amerlisimassasut Namminersorlutik Oqartussat naatsorsorpaat.
Napparsimasut amerliartupallannginnissaat siunertarineqarpoq. Sukkortut katsorsarneqarnerat pitsanngortinneqassaaq, inooriaatsimillu nappaateqalersimasut periarfissagissaarnerulissallutik.
Novo Nordisk Fonden soqutiginnittoq
Novo Nordisk Fonden Namminersorlutik Oqartussanut soqutiginnillutik 2017-imi suleqatiserinnipput. Sukkortunut sullissivittaarnissamut ukioq ataaseq qaangiummat illuatungeriit suleqatigiinnissartik isumaqatigiissutigaat.
Qanorlu aningaasalersornissa maanna ukiut marluk qaangiuttut inisippoq, suliniummullu najoqqutassiaq sukumiisoq maanna tamanut saqqummiunneqarpoq. Tassani sullissiviup sumi inissisimanissaa ilaatigut atuarneqarsinnaavoq - najoqqutassiaq uani atuaruk.
- Inooriaatsimit nappaatillit nalunngisatsitut ukiuni kingullerni amerliartupiloornikuuppit. Puallaraluttuinnarpugut, pujortartarnerup kingunerisaanik nappaatit assigiinngitsut pilersarput. Ilaatigullu avataaniit sunnerneqarnitta kingunerisaanik inooriaasitsinnik allannguinitsinnit peqqissuserput sunnerneqarnikorujussuuvoq.
AAMMA ATUARUK Nunatsinni sukkorneq pillugu sullissivileqalernissaanut 382 millionit koruuninik aningaasaliisoqartoq
- Taamaattumik taakku (Novo Nordisk Fonden aaqq.) suleqatiginerisigut Steno Diabetescenter Grønlandimik pilersitsinissaq tikikkiartuaarneqarnikuuvoq, peqqissutsimut naalakkersuisoq Martha Abelsen KNR-imut oqarpoq.
Taassuma oqarnera naapertorlugu Novo Nordisk Fonden 382 millionit koruuninik aningaasaliiniarnerminut Namminersorlutik Oqartussanut immikkut piumasaqaateqarsimanngilaq.
- Novo Nordisk Fondenip nunatsinni ilisimatusarlunilu pinaveersaartitsineq qanoq ineriartortinneqarsinnaanersut soqutigisarai. Immikkut piumasaqaateqanngillat soorlu "imaaliussaasi imatullu" imaluunniit "nakorsaatinik aalajangersimasunik atuissaasi", Martha Abelsen oqarpoq.
Martha: Sullissivik ukiut qulit qaangiuppata ataannassaaq
Novo Nordisk Fonden ukiunut qulinut aningaasaliivoq. Suliniutillu assigiinngitsut piffissami aningaasaliiffigineqaqqissanersut suliniutinilluunniit allanik aallartitsisoqartassanersoq nalilersorneqartuassapput.
- Ukiut qulit ingerlanerini, uuma isumaqatigiissutip naajartuaanerani, matusisoqassasoq naatsorsuutiginngilara. Naatsorsuutigivarali suliniutit assigiinngitsut ukiut qulit ingerlanerini sivitsuisinnaanissamik isumaqatigiissuterput ingerlaavarumaartoq, taanna oqarpoq.
AAMMA ATUARUK Novo Fond sukkorneq pillugu sullissiviliornissamut millionerpassuarnik aningaasaliiniartoq
Sullissivik "Steno Diabetes Center Grønland" ukiut sisamat qaangiuppata atoqqaarfissiorneqassaaq tassani peqqissutsimik suliallit soorlu peqqissaasut, nakorsallu sulilissallutik.
Taakkua sukkornermik inooriaatsimillu nappaatinik katsorsaallutik, paasititsiniaallutik, ilisimatusarlutik taavalu ilisimasanik katersissapput.
Aningaasaliissutit 382 millionit koruunit marlunnut avinneqarput. Ilai sullissivimmik sanaartornermut ilaalu sullissivissap 2024-mi ammarpat ingerlatsinermut atorneqarneqassapput.
