Air Greenland: Ilaasut 400-t missaanniittut silarlummik ingerlariaqqinnaveerput
Kitaata sineriaani silarlunnera peqqutaalluni ilaasut 400 missaanniittut ingerlariaqqinnaveerput.
Air Greenlandip timmisartuanut ilaallutik Nuummiit, Maniitsumiit, Paamiuniit Sisimiunullu angalasussat eqqugaaqqapput.
Nuummi, Maniitsumi Paamiunilu ullumi silarluttussaammat timmisartuussinissat ippassarli taamaatinneqarput.
Taakkuinnaanngillalli:
- Sisimiut eqqani silaannaq unerisimannginnera pissutigalugu, Kangerlussuarmiit Sisimiunut ullumi misiliigaluarluta Kangerlussuarmut utiinnartariaqarsimavugut, Air Greenlandimi avammut attaveqaatilerisoq, Inga Dora Guðmundsdóttir Markussen oqarpoq.
Angalasussalli tamarmik angalanissamut pilersaarummik nutaamik nassinneqartut, taassuma ilanngullugu oqaatigaa.
AAMMA ATUARUK DMI: Nuummi ulussaarsuartut sakkortutigisumik anorersuartoq
Nuummi anoraa sakkortunerpaaffissaminiinnerani sekundimut 30-31 miiteri angusarpaa, Maniitsumi sekundimut 20 miiterit angullugit sakkortussusilimmik anorlerpoq, Paamiunilu anorip sakkortunerpaaffiani sekundimut 10-12 miiterisut sakkortussuseqarpoq.
Umiarsuaq ilaasartaat Sarfaq Ittuk ullaap tungaani Nuup kangerluani oqquisimaarpoq. Ilaasartaat ullaaq arfineq pingasut qeqqanut Nuummut tulattussaagaluarpoq, anorersuarluni mallerpallaarmat Nuup kangerluata saani oqquiartorpoq.
Ullumi Danmarkimiit Nuummukartussat, Nuummiillu Danmarkimukartussaagaluit aallanngitsoortut, arfininngornermi sapaammilu angallanneqassasut Air Greenlandip ilanngullugu paasissutissiissutigaa.
