Air Greenland: Sapaatip akunnerini kingullerni kinguaattoornerit marlunnik ilikkagaqarfigaagut

Air Greenlandip timmisartuussinera putsup sapaatip akunnerini kingullerni kinguaattortingaatsiarpaa, kinguaattoornerlu ilaasussanik sumiiffinni arlalinni kanngisimatitsivoq.

Maanna timmisartuussisoqaqqilereeraluartoq pujoq akornusersueqqilissappat Air Greenland kinguaattooqqeriaannaavoq.

Kinguaattoornermilli misillertitaareerlutik putsup akornuseeqqissinnaaneranut maanna piareersalereerlutik, Air Greenlandip pisortaanera Jacob Nitter Sørensen oqarpoq.

Sinerissami ulluni tulliuttuni suli putseqattaarnissaa ilimasaarutigineqarpoq. Taamaassappallu Air Greenland putsumit kinguaattoortitaaqqeriaannaavoq.

Putsup akornusersueqqilersinnaaneranut piareersalereerlutik Jacob Nitter Sørensen KNR-imut oqarpoq.  

AAMMA ATUARUK Ingerlariaqqinneq ajulertorpassuaqareersorlu: Air Greenland timmisartornissamut billetseerniaqqilertoq

Air Greenland sapaatit akunnerini kingullerni putsumit akornusersorneqangaatsiarmat ilaasussarpassuit sumiiffinni arlalinni kanngipput. Nunatsinni sila allanngorartuartillugu, taama nalaataqaqqinnginnissamik oqartoqarsinnaanngitsoq, Jacob Nitter Sørensen oqarpoq. 

Siniffiit amerlanerusut attaveqarnerunerlu 

- Aasaq manna ajornartooqqavugut. Silassamik ilimasaarutit soorunami malinnaaffigaagut, kinguaattoornaveersaarlutalu timmisartuussinerput nalimmassarniarparput. Ajornartooqqagattali timmisartuussinermillu suliallit tamarmik taamaammata, taamaalisooqqinngissaq neriorsuutigisinnaanngilara, Jacob Nitter Sørensen oqarpoq.

Angalaniartut 1.000-it missaanniittut nunatta ilaani sumi tamaani sapaatit akunneranni kingullermi ingerlariaqqinneq ajuleqqapput. Taamaammat Air Greenlandip kinguaattoortut ikilinissaasa tungaanut billetsinik tuniniaanini unitsippaa.

Ilaasussat ingammik Kangerlussuarmit nikeriarsinnaajunnaaqqasut amerlasimapput - timmisartuutilieqatigiiffillu timmisartumik Københavniliaassisussamik tallimanngormat aatsaat attartorpoq. Ingerlatseqatigiiffimmit oqaatigineqarpoq pissutsit maanna ima nalinginnaatigilersut, ataasinngornermiit billetsinik tuniniaaneq ammaqqinneqarluni.

Ajornartoornermiilli timmisartumik attartornissamut ullut tallimat ingerlapput. Air Greenlandip paaasissutissiinera naapertorlugu Europami suliumajunnaartoqarlunilu aasani marlunni kingullerni coronaqareersorlu angalajumasorpassuaqarmat timmisartunik attartugassaqarpianngitsoq.

Siullermik sinerissami mittarfiit 799 meteriinnaasut miffigissagaanni, qanorluunniit teknikkikkut atortorissaartigigaluaraanni timmisartuussisarnermi sillimaniarnikkut inatsisit malillugit mittarfik tamaat isigisinnaasariaqarpoq.

- Mittarfiit 799 meterinik takissusillit naatsuugamik aamma eqqoqqissaartumik miffigisariaqarput, Jacob Nitter Sørensen oqarpoq.

AAMMA ATUARUK Kangerlussuarmi ulappunnersuaq: Uuttuut 1-miit 10-miippat uagut 9-miippugut

Nuummi Ilulissanilu mittarfissuassanut pujoraluartumiluunniit minniartarneq ajornannginnerussasoq oqaatigaa:

- Mittarfissuassat silinnerusussaagamik pujortumi miffigiuminarnerussapput, qeqqanni sinaannilu qulliit sumiissusersiornermut iluaqutissiat timmisartunut ersarittorujusuusussaammata miffissarlu aamma takinerussalluni, Nitter Sørensen oqarpoq.

Ajornartoornerli inuiaat timmisartuutileqatigiiffiannut ilinniarfiuvoq. 

- Siullermik soorlu Facebook aqqutigalugu pisarnermit akulikinnerusumik paasissutissiisarnissaq kiisalu siunissaq ungasinnerusoq eqqarsaatigalugu timmisartorsuarmik sapaatip akunneranut ataasiarluta attartortarnissatsinnik timmisartuutileqatigiinnut allanut isumaqatigiissuteqarniarnissaq. Tamanna soorunami akisunerulaassaaq, sillimmasiinertulli isigineqarsinnaavoq, Jacob Nitter Sørensen oqarpoq.