Amerikamiut timmisartui malersuutit Kangerlussuarmut mittut

Illersornissaqarfiup timmisartui malersuutit ikinnerpaamik tallimat Kangerlussuarmi ippassarli orsersoriartorput. Danmarkimi illersornissaqarfiup ilisimatitsissutigaa tassaasut timmisartut USA-meersut.

Sermitsiaq.ag. taama allaaserisaqarpoq.

Timmisartut suminngaanneernersut, soorlu Kangerlussuarmiinnersut, Sermitsiaq.AG-p paasiniarsimavaa.

Innuttaasut ilaatigut ernumassuteqarnerat naalakkersuisut siulittaasuata Múte B. Egedep paasisinnaavaa, eqqissisaallunili.

- Timmisartut ernumalersitsisinnaanerat paasisinnaavara. Nunattali Ukrainemi sorsuttoqarneranut ilanngunneqarsinnaanissaanut maanna ernummatigineqartariaqanngilaq. Ruslandip aningaasarsiornerata pillaatitut eqqorneqarnissaanut peqataavugut, sakkutuulersornikkut allatigulluunniit iliuuseqanngilagut, Múte B. Egede Sermitsiaq.AG-mut oqarpoq.

Amerikamiut timmisartuisa assingat inuit Facebook aqqutigalugu siammarterpaat, inuppassuillu asseq oqaaseqarfigalugu. Europamimi maanna sorsuttoqarpoq, Ukrainep Ruslandillu akornanni sorsuttoqarluni.

Amerikamiut timmisartui immikkut akuersissuteqarlutik Kangerlussuarmiittut illersornissaqarfiup ilisimatitsissutigaa, orsersoriarlutik sungiusariartussallutik.