Anaanaq coronamut misissuinermut allannguummut: Iliuuseqartoqarnera qujanaq meeqqalli illersorneqarnerusariaqarput
Coronavirusip tuniluutileruttorneqarani meeqqat illersorniarlugit politikikkut akisussaasut iliuusaat akerleralugu atsiornernik katersisoqarpoq.
AAMMA ATUARUK Angajoqqaat kajumissaaruteqartut: Meeqqat akunnerpassuarni siuleriiaattariaqarunnaassapput
Atsiornernik katersisup Nitta Lyberth-Mørchip atsiornerit 516-it katersani oqartussanut tunniuteqammitsiaannarai Naalakkersuisut tusagassiortunik katersortitsipput. Coronavirusimik tunillatsissimasinnaasunut misissueriaaseq allanngortinneqartoq nalunaarutigalugu. Allanngortitsineq ilaqutariinnut meerartalinnut sunniuteqartussaq.
Sukkasuumik misissuisortoqartassasoq, naalli periusissiaq?
PCR-imik misissortinneq sukkasuumik missuutinik misissortinnermit taarserneqassaaq. Tassalu misissortinnissamut akunnerpassuarni utaqqisariaqarneq atorunnaarluni. Ilaqutariit meerartallit utaqqerujussuartariaqartarnerat Nitta Lyberth-Mørchip isornartorsiutigisaasa ilagaat.
AAMMA ATUARUK Misissuisarfiit napparsimmaviillu ilungersungaatsiarmata kikkunnut tamanut PCR-imik misissuisoqartarunnaartoq
Nitta Lyberth-Mørchip akunnerpassuarni utaqqisariaarunnini nuannaarutigaa, sukkasuumilli misissortittarnermi periusissiamik maqaasisaqarpoq.
Misissuisarnermut periuseq nutaaq
Misissueriaaseq allanngortinneqarpoq, taamaalilluni eqimattat maluinnaat misissuisarfimmut PCR-imik misissortikkiartorsinnaalerput:
Tassa utoqqaat inuillu uummatikkut puatigullu nappaateqartut tunillatsissimanermillu ersiuteqartut misissortikkiartorsinnaapput. Aamma inuit angerlarsimaffimminni sukkasuumik misissuutinit tunillatsissimasutut takussutisserneqartut.
Peqqisseqqittutut nalunaarutiginissaq, angerlarsimaffimmi misissornissaq kiisalu coronamik tunillatsissimaneq nuannertut nuallunnertullu kisimi misigisimanarpat napparsimmavimmut nakorsamulluunniit attaveqarani angerlarsimaffimmi mattusimaannarnissaq inuit namminneq akisussaaffiginerulerpaat.
Tamanna misissuisarfiit napparsimmaviillu malinnaasinnaajunnaarnerannik pissuteqarpoq.
Neriniartarfiit imerniartarfiillu sapaatini akunnerni marlunni tulliuttuni unnukkut quliniit ullaakkut tallimat tungaanut matoqqasassapput.
Nunatsinni tunillatsissimasut aatsaat taama amerlatigipput: Katillutillu maanna 2.718-iullutik.
- Kommuuniminngaanniit tusagaanngilagut qanoq periuseqartoqassanersoq. Meeqqerivimmut paasiniaagaluaratta meeqqerivik qanoq periuseqartoqassanersoq suli tusagaqarsimanngilaq. Taamaammat erseqqissumik paasitinneqarnissarput qilanaarnarlunilu erininarpoq, Nitta Lyberth-Mørch oqarpoq.
Sukkasuumik misissuutinik agguaanissat kommuunit namminneq aaqqissuutissagaat Naalakkersuisut tusagassiortunik katersortitsinerminni oqarput. Taakkua meeqqerivinnut, utoqqaat angerlarsimaffiinulluunniit qanoq agguaaniarnerlutik namminneq aqussavaat.
Meeqqani tuniluunneq iliuuseqarfiginerusariaqartoq
Suliniutit aappaat tassaavoq meeqqat tallimanit aqqanilinnut ukiullit coronavirusimut akiuussusersorneqarnissaat.
Akiuussusersuineq siulleq Nuummi tallimanngorpat pissaaq, nunallu sinnerani aamma meeqqanut akiuussusersuisoqassalluni.
Akiuussusersuiniarneq Nitta Lyberth-Mørchip nuannaarutigaa.
- Kiisami meeqqatta illersuutissaannik periarfissaqalermat qujanartorujussuuvoq.
AAMMA ATUARUK Corona: Meeqqat minnerit tallimanngorpamit akiuussuserneqarsinnaalissasut
Meeqqat akornanni coronavirusertoqartoq paasineqaraangat meeqqat qanillisimasut angerlartinneqartanngillat. Angajoqqaalli meeqqatik misissortissagaat kaammattorneqartarput. Taamatullu aaqqinneq naammagimmat iliuuseqartoqaqqullugu tassa atsiornernik katersisoqaraluarpoq.
- Tuniluunnearup unitsinniarnissaanik iliuuseqarnissannik paasisaqanngilanga. Aamma ippassaq tusaasakka aallaavigalugit imatut paasivara "sulissutigineqarnianngitsoq".
Nuummi meeqqat akornini coronavirusi tuniluuttorujussuusoq nunatta nakorsaanera Henrik L. Hansen tusagassiortunik katersortitsinermi ippassaq oqarpoq. Meeqqat tallimat qulingiluallu akornanni ukiullit pingasuugaangata ataaseq coronavirusinngikkuni coronavirusersimasoq kisitsisit takutippaat.
