Angut 43-nik ukiulik meeqqat inuttaralugit pornolianik pigisaqartutut eqqartuunneqartoq
Angut 43-nik ukiulik ulluni 30-ini pineqaatissinneqarsimasunut inissiisarfimmi inissitassanngorlugu piumasaqaatitaqanngitsumik Eqqartuussisoqarfik Sermersuumi ippassaq eqqartuunneqarpoq.
Angut eqqartuussaasoq 43-nik ukiulik meeqqat inuttaralugit pornolianik assinik 155-inik filminillu qiukkanik qulinik peqarsimalluni nassuerpoq.
Angut Nuummi najugaqarfimmi decembarip qaammataani 2019-mi tigusarineqarpoq unnerluutigineqarlunilu. Najugaqarfimmi politiit uppernarsaatissanik ujaasinermi assit filminillu qiukkat harddiskeni pingasuni nassaaraat, angutillu taakku nammineq pigisaralugit eqqartuussivimmi nassuerutigaa.
Eqqartuussivimi unnerluussisussaatitaasut oqarput suliaq meeqqanut tunngasuummat sukannernerulersittartaqartoq, tamannalu unitsittariartoq.
- Meeqqat kinguaassiuutitigut atuinermut ilanngutitinneqassanngillat, unnerluussisussaatitaasoq oqarpoq.
Sakkortunerusumik eqqartuunneqartoq
Unnerluussussisussaatitaasut aallaqqaataaniit piumaasaqaatigaat angut 43-inik ukiulik pineqaatissinneqarsimasunut inissiisarfimmi inissinneqassasoq, taamaasillunilu ukiup ataatsip iluani pinerloqinngikkuni aatsaat pineqaatissinneqarsimasut inissiisarfianiittussanngussalluni.
Ima paasillugu ukiup ataatsip ingerlanerani pinerloqqinngikkuni pineqaatissinneqarsimasunut inissinneqassanngitsoq.
AAMMA ATUARUK Angut Nuummi meeqqat inuttaralugit pornolianik pigisaqarsimasutut unnerluutigineqartoq
Kisianni eqqartuussisut tassaasut eqqartuussisoq arnaq ataaseq eqqartuussisooqataasullu arnaq ataaseq angullu ataaseq, angut 43-nik ukiulik eqqartuuppaat piumasaqaatitaqanngitsumik ulluni 30-ni pineqaatissinneqarsimasunut inissiisarfimmut inissinneqassasoq eqqartuuppaat.
Tamatuma kinguneraa ukiup ataatsip ingerlanerani pinerloqqinngikkaluaruniluunniit qaammat ataaseq pineqaatissinneqarsimasunut inissiisarfimmmut inissinneqassasoq.
Eqqartuussisut eqqartuussisooqataasullu nalunaaquttap akunnerata affaata missaani taasinissamik isumaqatigiinniarput.
Eqqartuussutip oqaatiginerani eqqartuussisoq oqarpoq sakkortusaataasoq angutip assit filmilallu pineqartut nammineq pigalugit nassuerutigimmagu. Eqqartuussisoq amma oqarpoq ukiup affaata ingerlanerani assit 155-it filminillu qiukkat 10 inerteqqutaasut meeqqanik 18 inorlugit ukiulinnik inuttallit katersorsimagai, aamma ikinngumminit linkit inerteqqutaasut internetsimi nassaarinissaannut ikiorneqarsimalluni.
Internet taartoq
Angut eqqartuussaasoq eqqartuussivimmi nassuiaavoq, tusagassiuutitigut assinik meeqqat kinguaassiuutitigut ilanngutitinneqarnerat ilismasaqarfigileqqaarsimallugu. Ikinngutaata kingorna internetsimi taartumi linkinut isernissaanut ikiorpaa.
Internetsi taartoq tassaavoq internetsip ilaanut atuisut kikkuunerinik paasiuminaallisagaasumut taaguut. Tamatuma atuisunit allanit sulerinernik aamma sumiinnermik takuneqarsinnanngillat.
AAMMA ATUARUK 33-nik ukiulik meeqqanik pornoliat pissutigalugit qaammatinik qulinik pineqaatissinneqartoq
Eqqartuussivimmi nassuiaanermini 43-nik ukiulik oqarpoq taamani taama pisoqarmat assut hashimik atuisarsimalluni, ullormut koruuninik 500-nik nalilimmik.
Kingunerisaanillu harddiskeni taakkunani pingasuni assit filminlilu qiukkat suunersut erseqqissumik eqqaamasinnaannginnerarpaa.
Uerinartoq
Eqqartuussinermi pisarneq malillugu angut 43-nik ukiulik kingulliulluni oqaaseqarpoq.
Tassani oqarpoq hashitortrunnaareerluni malugisimallugu timini qanoq peqqinngitsigisoq. Allat assinik taamaattunik isiginnaartut mianersoqquai, taamaattunik isiginnaarluni ulorianarmat, hashitullu uerinartigaluni, tappingertitsisinnaallunilu.
43-nik ukiullip eqqartuussut akueraa, kisianni unnerluussisussatitaasut ulluni 14-ini eqqarsarfissaqartitaarusupput.
Unnerluussisussaatitaasut suliaq pillugu KNR-imut oqaaseqarusunngillat, 43-nillu ukiullip illersuisua, Ulrik Blidorf aamma unnerluussisussaatitaasoq eqqarsarfissaqartitaarusummat oqaaseqarnianngilaq.
- Oqaatigisinnaasara tassa eqqartuussut akuerigatsigu, eqqartuussugtip oqaatigineqarnerata kingorna Ulrik Blidorf oqarpoq.
