Angut Nuummi meeqqat inuttaralugit pornolianik pigisaqarsimasutut unnerluutigineqartoq
Pisut sakkortuut aallaavigalugit Sermersuup Eqqartuussiviani ullumi eqqartuussisoqassaaq.
Pornoliat meeqqanik inuttallit assingi 155-it filmiliallu qulit Sermersuup Eqqartuussiviani ullumi eqqartuussinermi tunngaviussapput.
Angut unnerluunneqartigineqartoq pornonik meeqqanik inuttalinnik pigisaqartutut, 2019-imi decembarimi paasineqarpoq.
Unnerluussissut KNR-ip takunnissinnaaffigisaani tamanna takuneqarsinnaavoq.
Meeqqat 18-it inorlugit ukiullit inuttaralugit pornoliat pineqartillugit immikkoortut pingasuusarput.
Imikkoortoq 1 naapertorlugu pornografiimik meeqqanut tunngasumik pilersitsinermut eqqartuunneqassaaq kinaluunniit 18-it inorlugit ukiullit assinginik imaluunniit filmilianik assigisaannilluunniit takusassianik kinguaassiuutitigut kannguttaatsuliornermut tunngasunik pigisaqartoq.
Angut immikkoortoq 1 naapertorlugu assinik 64-inik pigisaqartutut unnerluutigineqarpoq.
AAMMA ATUARUK 33-nik ukiulik meeqqanik pornoliat pissutigalugit qaammatinik qulinik pineqaatissinneqartoq
Immikkoortoq 2 naapertorlugu taamatuttaaq pineqassaaq kinaluunniit 18-it inorlugit ukiullit assinginik kinguaassiuutitigut kannguttaatsuliornermut tunngasunik imaluunniit filmilianik assigisaannilluunniit takusassianik kinguaassiuutitigut inuunerlunnermut tunngasunik pigisaqartoq imaluunniit akiliilluni takusaqartoq.
Imikkoortoq 2 naapertorlugu angut assinik 82-inik pigisaqartutut unnerluutigineqarpoq.
Immikkoortoq 3 naapertorlugu meeraq 18-it inorlugit ukiulik peqqarniitsumik kinguaassiutitigut atornerlugaasoq, pinngitsaalillugu atoqatigineqartoq, sakkortuumik nakuuserfigineqartoq imaluunniit sioorasaarneqartoq assilineqarsimanngikkunik filmiliarineqarsimasarpoq.
Immikkoortumi tamatumani assilissamik takuneqarsinnaasarpoq meeqqap inuunera ulorianartorsiortoq immaqaluunniit sakkortuumik innarlerneqarsimasoq.
Immikkoortoq 3 naapertorlugu angut unnerluutigineqartoq assinik filmilianilluunniit qulingiluanik pigisaqartutut unnerluutigineqarpoq.
Taakku saniatigut filmilianik qulinik immikkoortoq 1, 2-lu naapertorlugit aamma pigisaqartutut unnerluutigineqarpoq.
Angut unnerluutigineqartoq qassinik ukioqarnersoq KNR-imit ilisimanngilaq.
Pinerluuteqaqqikkuni ullunik 30-nik pillagaassasoq
Unnerluussutit naapertorlugit angutip pigisai harddiskit, tassa qarasaasiaq atorlugu sunilluunniit toqqorsivigineqarsinnaasut, pingasut assinik filmilianillu imallit nassaarineqarput.
Angutip illersuisua, Ulrik Blidorf, KNR-imiit oqaaseqartinniaraluarparput, taannali suliaq aallartitsinnagu oqaaseqarusunngilaq.
Taamaattumik angut pisuusutut imminut nassuerutigisimanersoq, immaqaluunniit pinerluutinik pineqartunut pisuujumannginnersoq ilisimaneqanngilaq.
Angut ukiumi tulliuttumi pinerluuteqaqqissappat, ulluni 30-nik pineqaatissinneqarsimasunut inissiisarfimmiitinneqarnissaa unnerluussisussaatitaasut piumasaraat.
Tassalu ukiup ataatsip iluani nutaamik pinerluuteqaqqikkuni pineqaatissinneqarsimasunut inissiisarfimmiitinneqassaaq.
Tamatuma saniatigut assit filmiliallu arsaarinissutigineqarnissaat unnerluussisussaatitaasut kissaatigaat.
Eqqartuussineq ullumikkut aalajangiiffigineqassanersoq ilisimaneqanngilaq, suliarli KNR-ip malinnaaffigaa.
