Angut arnamik Aasianni toqutseriarsimasutut politiinit tigummigallagaasoq

Angutit marluk nakuusersimasutut pasineqarlutik inatsit tunngaviusoq aallaavigalugu killisiorneqarnermi kingorna tigummigallagaapput.

Nuummi Aasiannilu nakuusernerit pillugit suliat misissuiffigineqarput.

Angut 33-nik ukiulik Aasianni imerniartarfiit ilaanni arnamik arfininngornermi ullaassakkut toqutseriarsimanerarneqarpoq.

Kalaallit Nunaanni Politiit pigaartuisa pisortaat Preben Kleist KNR-imut taama ilisimatitsivoq.

Arnaq kingorna napparsimmaviliaanneqarpoq.

- Arnap qanoq inneranut suli tusagaqanngilagut, Preben Kleist oqarpoq.

Angut inatsit tunngaviusoq aallaavigalugu arfininngornermi killisiorneqarpoq, ullunilu 20-ni tigummigallagassanngortinneqarluni.

Sakkortuumik nakuuserniartoqarsimasoq politiit aallaqqaammut oqaatigaat, misissuinerilli kingorna taava oqarput angut toqutseriarsimasutut pasineqartoq.

Nuummi suliamut atatillugu angut 28-nik ukiulik sakkortuumik nakuusersimasutut pasineqarpoq maannalu tigummigallagaalluni.

Nuummi inissiat ilaanni nakuusertoqarsimaneranut tunngavoq. Angut 28-nik ukiulik angut alla sakkortuumik nakuuserfigisimagaa oqaatigineqarpoq. Tamanna tallimanngornermi unnukkut pivoq.

Angut nakuusertutut pasineqartoq ulluni 26-ni tigummigallagassanngortinneqarpoq.

Politiit sulianut marlunni taakkuni misissuileruttorput.