Angut killiligaanngitsumik pineqaatissinneqartoq

Angut 53-inik ukiulik Tasiilameersoq inooqatigisimasaminut peqqarniitsumik persuttaasimasutut pineqaatissiissutaa Nunatta Eqqartuussivianit ulloq 6. septemberi aalajangersarneqarpoq.

Persuttaaneq Tasiilami 2021-mi februaarip qaammataani pisimavoq, tassanit angutip inooqatigisimasani niaquatigut timaatigullu naneruuserfimmik arlaleriarluni annersarsimavaa. Arnaq arlalitsigut ajoqusersimavoq, ilaatigut najungasumigut, ulussami saarngatigut assaammigullu napisimalluni.

Kalaallit Nunaanni Politiit tusagassiorfinnut taama nalunaaruteqarput.

Angut inooqatiminut persuttaasimasutut siusinnerusukkut pineqaatissinneqareerluni sapaatip akunialunngui qaangiutiinnartut iperagaareernermi kingorna persuttaaqqissimasoq politiinit nalunnarutigineqarpoq.

Angut toqutsisimasutut siusinnerusukkut pineqaatissinneqartareerpoq aamma ukiukitsumut pinngitsaaliilluni arnerisimasutut pineqaatissinneqartareersimalluni. Angutip inooqatigisimasaminut persuttaanngitsianermini arnamut allamut aamma persuttaasimasut Nunatta Eqqartuussivianit pisuutinneqarpoq.

- Angut allanik annertuumik ulorianartorsiortitsiuartarsimasoq matumani pineqarpoq, arlaleriarlunilu pineqaatissinneqartaraluarluni pissuserisartakkaminik allanngortitsisimanngilaq. Taamaammat innuttaasut angummut pineqartumut illersorniarlugit piffissaligaanngitsumik pineqaatissinneqarnissaanik naliliineq naammagisimaarluinnarpara, suliami unnerluussisoq Gutti Harryson oqarpoq.

Suliamut atitillugu angutip sianissusaa misissorneqarpoq aamma tarnip nakorsaanit misissorneqarluni tassalu taakku naliliineri malillugit piffissaligaanngitsumik pineqaatissinneqarluni.

Killiligaanngitsumik pineqaatissinneqarnereernermini angut aatsaat iperagaasoqarsinnaavoq inunnut allanut ulorianartorsiortitsisinnaanera oqartussanit nalilersorneqareerpat.