Angutit nunanut allanut unammisartut Kroatiami Futsal Weekimi peqataasut

Angutit inersimasut Futsalimik nunanut allanut unammisartut maanna Europap kangiani Kroatiamiipput. Tassani Futsal Week-imik taalluugu unammisaqattaartitsinerni, nunat allat sisamat unammisartui naapippaat.

Futsalweek unammersuarnerunngilaq, tassungali peqataaneq nunatta unammisartuinut sungiusaataalluassasoq, KAK-p allaffeqarfiani aqutsisoq, Niisinnguaq L. Geisler, oqarpoq.

- Tassani nunat assigiinngitsut unammiarnerminnut atukkajuttarpaat Futsal Weeki – sungiusarnertut. Imaluunniit nunanut allanut unammisartut nutaat, imaluunniit siunissami nunanut allanut unammisartuujumaalertussat. Takkua qaffasissumik misilittagaqalernissaat. Taakku pingaarnertut aamma taaneqarsinnaapput.

Futsalweek nunarpassuarnit peqataaffigineqartoq

Kroatimilu Futsalweek nunarpassuarnit peqataaffigiumaneqarluartartoq Nissinnguaq L. Geisler aamma oqarpoq

- Nunat tamapajaamik peqataasarput. Qaffasinnerpaanut ilaasut Europameernerusut, qaffasinnerpaanut ilaasut, soorlu Spaniakkut aamma tamakku ilaasarput.

Kroatiami Futsalweekimut angutit inuusuttut unammisartut aamma peqataapput.

- Massakkumut angutit kisimik peqataasarput, kisianni ukioq kingulleq U19-it, tassa inuusuttuaqqat angutit juunimi misiliisippagut. Tassanilu aamma pissarsiaqarluartorujussuupput.

AAMMA ATUARUK Unammersuariaaseq nutaaq: Divisionikkaarluni arsaanneq

Angutit Futsalimi unammisartut Krotiamiinnertik siunissami nunani allani unammisarnissamut atorluarniaraat Niisinnguaq L. Geisler oqarpoq:

- Ukiamut oktobari qaammat nunat avannarliit unammiuaartussaapput Nordic Cup-imik taasartagaanni. Taanna Danmarkimi ingerlanneqartussaavoq, angutit tassunga peqataasussaapput. Massakkullu una sungiusaatitut atorparput.

Futsalip silarsuaani nunarsuarmi sungiusaallammattut tusaamasaasoq Kroatiamiu Mico Martic Futsalweek-imik pilersitsisuuvoq.

Nunatta unammisartuisa Futsalweekimi Bosnien Herzegovinap, Estoniap, Ungarnip Rumæniallu unammisartui naapippaat.