Anikap arnat meeqqallu Ukrainemiut sorsunnermit qimaanerannik ikiorpai
Ruslandip Ukrainemut saassussinerani sapaatip akunneri marlungajaat qaangiummata inuit milliuunit marluk sinnerlugit qimaapput.
Kalaaleq Anika Krogh piumassutsiminnik ikiuiniartut ilagaat.
Sapaatiummat Danmarkimiit Ukrainep killeqarfianut nalunaaquttap akunnerini 50-ini biilinik angalaniarluni aallarpoq, arnat pingasut meeqqallu sisamat sorsunnermit qimaasut aallugit.
- Ornillugit arnat taakku qimaasunik inissiivimmut, nalinginnaasumik katersortarfiusumut, aavagut. Tassani arnaannat meeraannaallu natermi sinngupput. Arnallu attaveqarfimma takugaminnga qullililerput, Anika Krogh KNR-imut oqaluttuarpoq.
Anniaat uummammi malugalugu
Eqqugaasut isiginnaarutikkuinnaq takusimallugit tikillugit misigissutsikkut attortinnaqaaq.
- Uagutsinni TV-kkut isiginnarpakka nalligilerlugillu, kisianni nammineq tikillugit qanoq innersoq uummatikkut malugalugit allarujussuuvoq paasinarnerullunilu, Anika Krogh oqarpoq nangillunilu:
AAMMA ATUARUK Ivan Ukrainimeersoq angerlapallakkusuttoq: Anaanaga ataatalu isumannaatsumukassapput
- Arnat taakku najortillugit illartaqaagut, kisanni aamma qiaqatigiittaqaagut. Misigissutsikkut attortinnaqaaq, aamma oqaluttuassartaat tusarlugu.
Facebookimut ikkussineq 200.000 koruuninik kinguneqarpoq
Anika Krogh nammineq angalanermi saniatigut piumassutsiminnik ikiuuttunik pilersitsivoq, massakkullu bussinik Danmarkimiit Ukrainep killeqarfianut qimaasunik aallertunik aallartitsisarput.
- Uigalu aalajangeratta qimaasunik uagutsinni najugaqartitsisinnaalluta soorpianngitsunnguatut aallartippoq.
Aappariit Europakkoorlutik angalanissaminnut taperseerusuttoqarnersoq facebookimi allallutik aperipput. Angalaqqinnissamullu taperneqarnissamik suli pisariaqartitsipput, tapeerusuttut mobile pay-ikkut aningaasanik tunisisinnaapput. Uunga normumut: 53899512.
AAMMA ATUARUK Johan nunatsinneersoq Ukrainimi qaattartumeerisoqarnerani itertitaasoq: Annilaarnaqaaq
Erngiinnarli paasinarsivoq facebookikkut ikinngutaat assorsuaq ikiuukkusuttut.
- Inuit aningaasanik ima tunioraatigaat massakkut koruuninik 200.000-inik pissarsereerluta, inuillu nammineq piumassutsiminnik nalunaartarput aallerumallutik illusimatitsiumallutillu. Taamalu tassanngaannaq suliniuteerannguaq angisuunngoriataarpoq. Pisussaaffiliivoq, Anika Krogh 44-nik ukiulik ulluinnarnilu takornarianik sullissisoq oqarpoq.
Ruslandip Ukrainemut saassussinerata kingornatigut Ukrainemiut 749-t Danmarkimi qimaasutut akuerineqarnissaminnut qinnuteqarput.
Danskit qimaasunut aqutsisoqarfianni naatsorsuinermit tamanna takuneqarsinnaavoq.
