Anne Nivíka Grødem Visit Greenlandimi pisortanngussasoq
Visit Greenland nutaamik pisortartaassaaq.
Maannami pisortaagallartoq, Anne Nivíka Grødem, pisortanngussasoq, Greenland Visitimi siulersuisut aalajangerput.
Anne Nivíka Grødem nunatsinni takornarialerisut akornanni quarsaarnermik tupigutsannermillu kinguneqartumik Visit Greenlandimi maanna pisortaasimasup, Hjörtur Smárasonip, marsip naanerani soraarsitaareernerani pisortanngorallarpoq. Visit Greenlandip Hjörtur Smárason sooq soraarsitaanersoq nassuiarnikuunngilaa, tusagassiutinulli ima nalunaarluni:
- Siulersuisut ineriartornermik tassunga ingerlatsinermik anguniagaqarluni pisortatut sulineq pingaartissimavaa. Ajoraluartumik pisortani ukkatarisassap taassuma pingaarnerutineqarsimanera siulersuisuni tatigisinnaasimanngilarput.
AAMMA ATUARUK Takornarianik angallassisartoq Visit Greenlandip pisortamik nuannarineqartumik soraarsitsinerata kingorna: Paasisaqanngilanga
Tassa Anne Nivíka Grødem aggustip aallaqqaataani pisortanngussaaq. Taannna Visit Greenlandimi siulersuisut siulittaasuannut tullersortaasuusimasoq Sermersooq Businessimi pisortamut maanna tullersortaavoq.
Anne Nivíkka Grødemip takornariartitsinermi siunnersuisoqatigiinni pisortanngornera Visit Greenlandimi siulersuisut siulittaasup Anette Grønkjær Lingsip nuannaarutigaa:
- Visit Greenland nunarsuarmi piumasaqaatit annertusiartuinnartut piumaneqaraluttuinnartullu tunngavigalugit takornariaqarnerup patajaatsuunissaanik qulakkeerinissamut pingaarutilimmik suliassaqarpoq. Taamaattumik takornariaqarnerup nunaqavissunit aallaaveqarluni piginnitseqarlunilu siuarsarneqarnissaa siulersuisut kissaatigaat.
Anne Nivíkka Grødem Ilulissani inunngorlunilu alliartorsimasoq nunatsinni suliniutinik aallartitsinermik sulianillu aqutsinermik aamma misilittagaqarluartoq, Visit Greenland tusagassiutinut nalunaarpoq.
- Anne Nivíkap Grødemip pisortatut nutaatut Visit Greenlandip ”Takornariaqarnerulernissamik siunertaq”-mik taallugu 2021-miit 2024-mut periusissiaa aamma siuttuuffigilissavaa, takornariaqarneq nunaqavissunit peqataaffiginneqarlunilu piginneqataaffiusoq aallutissallugu, Visit Greenland allappoq.
