Takornarianik angallassisartoq Visit Greenlandip pisortamik nuannarineqartumik soraarsitsinerata kingorna: Paasisaqanngilanga
- Assinik paasissutissanillu siammarterusuppoq nunarsuarmi tamarmi Kalaallit Nunaat ilisimaneqarnerulernisassammat. Taamaattumik uggornaqaaaq soraarsitaammat. Kalaallit Nunaanni nunanilu allani ajunngivissunik aallartitsigaluarpoq.
Ole Zeeb Skifte takornarianik sullissivimmik Maniitsoq Adventure Tours-imik piginittoq taama oqarpoq.
Ole Zeeb Skifte Maniitsumut qanittumik takornarianik angallassilluni ornikkajutami eqqaani.
Assi: Nammineq pigisaq
Kalaallit takornariaqarnermik sullissiviit allat arlallit assigalugit Visit Greenlandip pisortarisimasaa Hjörtur Smárason qaammatip kingulliup naalernerani tassanngaannaq ingerlaannartumik atuutilersumik soraarsitaanera tupigusuutigaa.
Visit Greenlandip siulersuisuini siulittaasoq Anette Grønkjær Lings Hjörtur Smárasonimik soraarsitsineq pillugu tusagassiuutinut nalunaarummi ima nassuiaavoq:
- Siulersuisut ineriartornermik tassunga ingerlatsinermik anguniagaqarluni pisortatut sulineq pingaartissimavaa. Ajoraluartumik pisortani ukkatarisassap taassuma pingaarnerutineqarsimanera siulersuisuni tatigisinnaasimanngilarput.
Nutaatut pisortanngorpoq Anne Nivíka Grødem qanittoq tikillugu Visit Greenlandimi siulittaasumut tulliusoq.
Kisianni soorlu KNR-ip attavigisimasai arlallit oqartut piffissamik eqquineq ajornerusinnaanngingajapppoq.
Ukiut marluk sinnilaarlugit Kalaallit Nunaanni takornariaqarneq coronamit uninngatinneqarsimavoq, massakkullu ulapiffiunerpaaq qaammatini ikittunnguanik Visit Greenland pisortaminik taarsiivoq.
Takornariaqartitsineq nuna tamakkerlugu amerlanernit tigummineqartariaqarpoq
Tusagassiuutinut nalunaarummi sooq siulersuisut pisortaasimasoq Hjörtur Smárason tatigiunnaarsimaneraat allassimanngilaq. .
Kisianni allassimavoq Visit Greenlandip Kalaallit Nunaanni takornariaqarnerup piujuartitsisumik ineriartortinnissaa kissaatigigaa.
Visit Greenland aperigaanni kissaatigineqarpoq siunissami inuiaqatigiit kalaallit takornariaqarnermik annertunerusumik iluaquteqartariaqarput, aamma takornariartitsisarneq nunami tamarmi ineriartortinneqartassasoq nukittorsarneqarliunilu.
Tamannalu suliassaavoq Hjörtur Smárasonip kivissinnaanissaanut tatiginninngiffiusoq.
Takornariaqartitsinermik ingerlatalinni annilaarneq
Ole Zeeb Skifte Maniitsoq Adventure Tours-imeersoq tassaavoq Visit Greenland-ipå siunissami sullikkumasaannut assersuut.
Kisianni Hjörtur Smárasonip soraarsitaanera uggoraa.
- Hjörtur-imi aamma Visit Greenland-imit malugineqarluartutut misigisimavunga. Pitsaasumik tapersrersorpaannga, siunnersorneqarnissamillu aperisinnaajuarpakka. Soraarsitaasariaqarmat uggornaqaaq. Aallarnigai assut neriuuteqarfigilluaraluarpakka.
KNR Kalaallit Nunaanni takornariaqarnermik ingerlatsisunik mikisunik akunnattumillu angissusilinnik amerlasuunik Ole Zeeb Skifte-tulli Hjörtur Smárason-ip soraarsinneqarneranik tupigusuuteqartunik attaveqarpoq.
Arlalippassuit tamanit tusarneqarsinnaasunik oqaaseqarumanngillat, annilaangagigamikku Visit Greenland-imik suleqateqarnertik ajoquserneqassasoq.
Kisianni ataaseq apersorneqarumasimasoq tassaavoq Pitsi Høegh Qaqortumi Greenland Sagalands-imi pisortaasoq.
Siornatigut Visit Greenland-imi siulersuisunut ilaasortaavoq Hjörtur Smárason-imilu atorfinitsitseqataalluni.
- Soraarsitsineq tupannartorujussuuvoq. Paasisaqanngilanga, Pitsi Høegh oqarpoq.
Takornariaqarnermik ingerlatllit arlalippaassuit assigalugit pisortaasimasup soraarsinneqarneranut tunngavilersuummik kamigaateqarpoq.
- Pisortatut inissisimanerminit soraarsitaanera itinerusumik tunngaveqarsimassaaq. Oqartoqaannarsinnaanngilaq immaqa piujuartussaq pillugu isumaqatigiinnginneqarsimasoq, tamatumuunakkummi apeqqutit allat qaqinneqarput. Nassuiaammik amigaateqarpugut.
Hjörtur Smárason ukioq ataaseq sinnilaarlugu Visit Greenland-imi pisortaavoq.
Visit Greenland aamma Hjörtur Smárason apersorneqarumanngillat.
