Aputeqanngitsumi isumannaatsumik ukiortaarsiornissamut siunnersuut

Nuuk nalinginnaanngitsumik ukiaavoq, tamannalu decembarip qaammataani nalinginnaasumit allaanerulluni panernerullunilu kianneruneranik kinguneqarpoq.

Kiassiut piffissami sivisuumi plussimiippoq, maannali qerinnarneraniileqqippoq. Naalli nillernerugaluartoq apingalernissaa ilimananngilaq.

Aputeqannginneralu ukiortaamut sunniuteqarsinnaavoq, tassami qummoroortartut ileqqoq malillugu apummut kapputeriarlugit qummoroortinneqarsinnaanngillat.

- Taamaattoqannginnissaa neriuutiginarpoq, kisianni qummoroortartut uku tamarmik ikkulluarneqarsimanngikkunik siutitta eqqaatigoorsinnaanerat unammillernassaaq, Nuummi Qatserisartuni upalungaarsimasut pisortaata tullersortaa, Jens Mikkelsen oqarpoq.

Apummut taarsiutaasinnaasut

Taavami qummoroortartut ukiortaami qanoq pitsaanerpaamik aallartinneqarsinnaappat?

Periarfissat arlaliusut, Jens Mikkelsen oqarpoq.

- Sullulimmik pissarsisinnaagaanni taannalu nunamut ikkullugu imaluunniit qummoroortartumik igeriussiffimmik mikisumik sullulimmik sanasoqarsinnaaguni tamanna pitsaassaaq.

- Ukioq mannami taama aputeqanngitsigaluta qummoroortartut pingaartumik unammillernarnerpaassagunarput.

AAMMA ATUARUK Aputeqanngitsumi ukiortaarsiorneq – imatut qummoroortassaatit

Qummoroortartunik aallartitsinissamut periarfissamik allamik aamma peqartoq erseqqissaatigaa.

- Viinit puukuinik uppeqqajaannginnerussammatalu naqqani siorartersimasunik siorna aamma atuisoqarpoq. Tamanna aamma periarfissaavoq.

-  Qummoroortartut batterinik taaneqartartut ukioq manna tunisaanerunissaat ilimagaara, qummummi aallartartunit taakku ajornannginnerulaarput, Jens Mikkelsen oqarpoq.

Isumannaatsuunissaq nalinginnaasoq eqqaamallugu

Naalli Nuuk apissanngikkaluartoq Upernaviup Qeqertarsuup Tunuatalu nalaannit Kangerlussuarmut najugallit ukiortaamut apinissartik qilanaarutigisinnaavaat. Qaqortumi sapaatip akunnerani matumani aamma apivoq.

Tunumili allaanerusoq, DMI-mi silasiortoq, Peter Jacobsen paasissutissiivoq.

- Taakkunani panernartupilussuusussaarpasippoq. Ittoqqortoormiini ukiutoqqap unnuaata ukiortaallu nalaani immaqa nittaalertalissaaq. Tasiilamili sila ukiutoqqap kingornata tungaanut eqqissisimaffiussangatippara,taanna oqarpoq.

Ukiortaamut qummoroortartut ikkulluarnissaata saniatigut isumannaatsuunissamut nalinginnaasunik aamma siunnersuutissaqarpoq, qummoroortitsinermimi malinnissaat pingaaruteqartoq, Jens Mikkelsen oqarpoq.

- Imminut isiginnaartullu eqqarsaatigikkit. Isarussat illersuutit atukkit aamma qummoroortartut nammineq sanaajunngitsut akuerisaannaat atukkit. Qummoroortartoq tigummiinnarnagu aamma ungasilleqqaguk qummoroortartorlu qulangernagu.

Minnerunngitsumillu, Jens Mikkelsenip qummoroortartup atornissaanut ilitsersuutit tamanit misissorluarneqarnissaat kaammattuutigaa.

- Naak amaajuitsumik ikinneqartussaqartoq naluneqanngikkaluartoq, qanoq ittuunera ilisimanissaa aamma pitsaasuuvoq.