Arnap angut 61-inik ukiulik qaqilerummik nivaataaqqamillu toqukkaa

Arnaq 28-nik ukiulik angummik 61-inik ukiulimmik Solrød Strandimi toqutsisimasutut ukiuni aqqaneq-marlunni parnaarussassanngortinneqarpoq.

Allattoq Ritzau

decembarip 15-at 2021 11:42

Arnap 28-nik ukiullip angut 61-inik ukiulik Solrød Strandimi qaqilerut nivaataararlu atorlugit kiisalu arlaleriarlugu tilluarlugu isimmittarlugulu ukioq manna februaarimi toquppaa.

Roskildemi eqqartuussivimmi eqqartuussisunit suliaq naammassineqarpoq, Marinnguaq Kirsten-Marie Henriksenilu toqutsisutut eqqartuunneqarluni.

Toqutsinermi suliani ukiunik aqqaneq-marlunnik pineqaatissiisoqarnissaa tunngavigineqartarpoq. Eqqartuussiviullu taama pineqaatissiisoqarnissaa aamma aalajangeraa, suliami unnerluussisussaatitaasoq, Thomas Rasmussen oqarpoq.

Angut 61-inik ukiulik Solrød Strandimi, Birkegaardsallemi toqungasoq ukioq manna februaarip ulluisa 14-ianni nassaarineqarpoq.

Tamanna sioqqullugu arnap 28-nik ukiullip angut arlaleriarlugu tilluarlugulu niaquatigut timaatigullu qaqilerut nivaataararlugu imaluunniit assingusoq atorlugu kapisimavaa.

AAMMA ATUARUK Kalaaleq arnaq 27-nik ukiulik Københavnimi toqutsisimasutut parnaarussivimmi tigummigallagassanngortinneqartoq

Tamatuma saniatigut niaquatigut timaatigullu tilluarlugulu tukertarsimavaa aamma/imaluunniit tukkarsimavaa.

Arnap angummut attuumassuteqartup toqumik kinguneqartumik nakuusersimanini nassuerutigaa, toqutsinnginnerarlunili. Eqqartuussiviup taanna toqutsisutut eqqartuuppaa.

Arnap eqqartuussut akueraa parnaarussivimmiiginnassallunilu.

Nutaarsiassami kukkunermik nassaarsimaguit uunga allaffigineqarsinnaavugut.