Arsummiu: Peqqinnissakkut sullinneqarnerput ajornerulissaaq

- Kangilinnguani Sakkutooqarfik tamatigut iluaqutigisaqaarput. Qulimiguulimmik angallannermut iluaqutaaqaaq, maanngaanniit angallanniarneq ajornartorujussuugami, pingaartumik avannamukassagaangatta assersuutigalugu nakorsiassagaangatta pisariusarsinnaasarluni. Sapaatip-akunneri marluk ikinnerpaamik atortariaqartarpavut, taamaammat sakkutooqarfik matuneqarpat maanimiunut annertuumik sunniuteqarnissaa ilimanarluarsinnaavoq, Arsummi nunaqarfimmi aqutsisut siulersuisuini ilaasortaq Niels Peter Mikaelsen oqarpoq.

Kangilinnguani Sakkutooqarfik matuppat, tamassuma Arsummiunut qanoq sunniuteqartussaanera paaserusullugu, folketingimut ilaasortap, Doris Jakobsenip Siumumeersup, Illersornissamut ministeri Nick Hækkerup apeqquteqaateqarfigaa.

Nick Hækkerupillu akissuteqarnermini oqaatigaa, Kangilinnguani Sakkutooqarfiup matuneqarneranut atatillugu Arsummiunut tamassuma sunniutigisinnaasaat suli misissorneqarsimanngitsut.

Illersornissamulli ministerip oqaatigisinnaanerarpaa, qulimiguulimmik timmisartuussinissanut isumaqatigiissut atorunnaarsinneqarsinnaasoq aammalu nakorsamit kigutillu nakorsaannit nunaqarfimmiunut ikiuisarnermik isumaqatigiissut atorunnaarsinneqarsinnaasoq.

Illersornissamut ministerip akissutai aallavigalugit, Doris Jakobsenip Naalakkersuisut maanna saaffigai, Arsummiunut sullissinerup appariartinneqannginnissaa eqqarsaatigalugu Naalakkersuisut qanoq siunertaqarnersut paaserusullugu.

- Arsummiut nunaqarfitsik siunissami qanoq iliuuseqarfiginiarneqarnersoq maannangaaq nalornivaat, taamaattumik Naalakkersuisut tamassumunnga akissuteqartariaqarput, Doris Jakobsen oqarpoq.

Qanormi taava aaqqiisoqarnissaa, Niels Peter Mikaelsenip takorloorpaa? Taanna ima akivoq:

- Aaqqiissut pitsaanerpaaq tassaavoq avannaatungaaninngaanniit orninneqartaleraluarutta, angallatit kujataaninngaanneersut piunnaarlugit. Paamiunimi mittarfeqarpoq, avannamullu ingerlaqqinnissamut atorluarneqarsinnaalluni. Angallannerup eqaannerusumik ingerlalersinnaanissaa taamaasilluni ilimanarsinnaalluni, Arsummi nunaqarfimmi aqutsisut siulersuisuini siulittaasup tullia Niels Peter Mikaelsen oqarpoq.
Kangilinnguani Sakkutooqarfik matuneqarpat, taassuma taartissaa, Issittumi Sakkutooqarfik Nuummut nuunneqassaaq, Kangilinnguanili Sakkutooqarfik siusinnerpaamik 2014-imi aatsaat matuneqassaaq.