Tusass politiit oqarasuaataasa atassutaaruttarnerannik aaqqiinialeruttortoq

Politiit oqarasuaataat sapaatit akunneri marluk matuma siorna marloriarlutik atassutaarupput, taamaammat inuit normumut allamumt sianertassasut politiit facebookiminni kaammattuutigaat.

Politiit oqarasuaataasa siullermik marlunngornermi unnukkut aappassaanillu tallimanngornermi ualikkut nalunaaqutaq 14.30 atassutaarunneranni ualikkut nalunaaqutaq sisamat tallimallu akornanni sianerfigineqarsinnaasimanngillat.

Politiit oqarasuaataasa atassutaarunneranniit nalunaaquttap akunnialui qaangiutereersullu atassuteqaqqilerput. Atassutaarunnerallu politiit atassuteqaataasa PSTN-imik taaneqartartut pisoqalisimasut ajoquteqarnerannik peqquteqartoq, Tusass nalunaarpoq.

Atassuteqaatit taakkua pisoqaligamik atortorissaarutinullu nutaaliaanerusunut naleqqutinnginnamik ukioq manna atorunnaassapput. Atassuteqaatit taakku ima pisoqalitigipput, allaat kingoraartissaannik nioqqutissiortoqarunnaarnikuulluni.

Atuisulli nutaanik atassuteqaatitaartinniarnerat Tusassip naatsorsuutigisaanit sivisuneruvoq.

- Atassuteqaatit pisoqalinerat peqqutaalluni oqarasuaatit atassutaaruttarput, atassutaarukkaangatalu nammineerluta iliuuseqarfigisinnaasanngilagut. Atassuteqaatitoqqamik atuiunnaarnissaq aaqqiissutissaavoq, Tusassip niuernermut pisortaa Nikolaj Christoffersen oqarpoq.

Utaqqiisaasumik aaqqiissuteqarniarsarisut

Tassa ajornartorsiut tamanna politiit aaqqiivigisassarinagu Tusassip aaqqiivigisassaraa. 

- Iliuuseqarfigisavut marluupput. Siullermik atassuteqaatitoqqat atorunnaarsissavagut, assingusumillu nalaataqarnissarput ingalassimaniarlugu politiit oqarasuaataasa normui normullu allat pingaarutillit 70-imik aallartittut atassuteqaatitoqqat atorunnaarnissaasa tungaannut utaqqiisaasumik allamut atassuteqaasersussavagut.

Taamaaliornersimi qanoq ingerlava?

- Tamanna annerusumik oqaaseqarfigisinnaanngilara. Teknikeritta ulapputigaat, paasissutissiinissaannullu utaqqivugut.

AAMMA ATUARUK Politiit oqarasuaataat iluarseqqittut

Nikolaj Christoffersenip oqarnera naapertorlugu atassuteqaatitoqqat PSTN-it atorunnaarnissaat ukiup matuma naaneranut kinguartinneqarpoq.

- Assingusumik nalaataqarnissarput ingalassimaniarlugu atassuteqaatitoqqat atorunnaannginneranni taakkuninnga atuisuvut nutaamik atassuteqaaseqqaartariaqarpagut, taanna oqarpoq.

Oqarasuaatit angallattakkatigut qaammataasiatigullu attavikkut atassuteqarfigineqarsinnaasut

Oqarasuaatertik pinartoqartillugu sianerfissaq atassutaarukkaangat erloqisarlutik aammali allatigut attavigineqarsinnaallutik, politiit pisortaannut tullersorti oqarpoq.

- Pigaartutta oqarasuaataat atassutaarukkaangat soorunami erloqisarpugut. Atortorissaarutitigulli ajutooriaannaasarnitsinnut aamma piareersimasarpugut, taamaattoqaraangallu oqarasuaatit angallattakkatigut qaammataasiatigullu attavikkut atassuteqarfigineqarsinnaasarpugut, politiit pisortaannut tullersorti Katrine Sandgreen oqarpoq.

Atassuteqaatitoqqat atorunnaarpata, angerlarsimaffimmi oqarasuaatit suli atorneqarsinnaassapput. Taakkununngali atassuteqaatinik nutaaliaanerusunik Tusassimut pisiniarnissaq pisariaqassaaq.

Tusassip oqarnera naapertorlugu angerlarsimmaffimmi oqarasuaatit atassuteqaatitoqqanit atassuteqaatinut nutaaliaanerusunut atassuserneqarsinnaannginnerat peqqutaalluni taamaaliortoqartariaqassaaq.