Avanersuarmi piniartut aalisartullu aningaasanik taperneqarput
Qaanaami kaperlalluni, anorleqattaarluni sikulu saappallaarnera peqqutigalugu piniartut aalisartullu oktobarimili piniariarsinnaanatik iluamik isertitaarupput.
Taakku maanna ikiorneqarput.
Thulefondip Qaanaami, Siorapalummi, Qikertani, Savissivimmi Moriusamilu piniarnermik aalisarnermillu inuussutissarsiuteqartut tamaasa immikkut 5.500 koruuninik tapiissuteqarfigai.
AAMMA ATUARUK Avannaata Kommuniani borgmesterip Naalakkersuisut Avanersuarmi piniartunut ikiorseeqquai
- Unittuunnginnissaat pillugu, tassa ajornanngitsoq ippassaq aalajangerneq siullermeernerunngitsoq. Tassa siornagtigut taamatut aalajangiisoqarsimavoq, eqqaamanngileqiginga, kisianni tassa decembarip ingerlanerani aamma taamatut ukiorlunnersua peqqutigalugu aalajangiisoqarnikuuvoq taamani tapiisoqassasoq.
- Tassa taanna atorlugu tapiineq maanna ingerlateqqinneqaqqippoq 500 koruunimik annertusiallalaarlugu.
Aningaasaateqarfik Thulefond pillugu paasissutissat
Thulefondi Namminersornerullutik Oqartussanit 1979-imi pilersinneqarpoq. Aningaasaateqarfiup siunertaraa Avanersuarmi inuussutissarsiornikkut ineriartortitsinermi, kulturikkut avatangiisillu pillugit suliniutinut aningaasaliissuteqartarnissaq. Inuit ataasiakkaat, eqimattat imaluunniit peqatigiiffiit aningaasaateqarfimmut qinnuteqarsinnaapput.
Aningaasaateqarfimmut aningaasaliissuteqartartunut ilaavoq "USAIRFORCE", taanna amerikamiut Pituffimmik atuinerat tunuliaqutaralugu aningaasaateqarfimmut ukiumut 1,5 mio. kr.-it missaanni aningaasaassuteqartarpoq.
Aningaasaateqarfimmik ingerlatsineq Namminersornerullutik Oqartussaniit ukiut ingerlaneranni Avannaata Kommunianut nuunneqarpoq.
Aningaasaateqarfimmi siulersuisut katillutik arfineq marluupput, Qaanaamiit, nunqarfittaani aqutsisunit Avannaatalu Kommuniani borgmesterimit kommunaldirektørimillu inuttaqarlutik.
Inughuit aningaasaateqarfiat Thulefondi ukiut marluk matuma siornagut aamma tapiissuteqarpoq, taamani Avanersuarmi piniartut aalisartullu qaammatini arlalinni isertitaqanngereerlutik ajornartoormata aningaasaateqarfimmit decemberimi 2020-mi 5000 koruuninik tapiiffigineqarput.
- Inuuniarneq oqimaatsorujussuanngortarami tamatuma nalaani, silaannaap allanngoriartornera takkumalli. Taanna assorsuaq paaseqqunaraluarpoq. Allatut aaqqiisoqanngippat siunissami taamaattuaannarnissaa Qanaarmiunit Avanersuarmiunillu tamanit naatsorsuutigineqarsinnaavoq.
Thule Fondip siulittaasua Jens Danielsen taama erseqqissaavoq.
AAMMA ATUARUK Naalakkersuisut nunatta avannaani piniartunut suliffissarsiornissaannik kaammattuinerat: Isornartorsiorneqangaatsiarpoq
Thulefondip allattoqarfia Avannaata Kommuniata ataaniippoq, allattoqarfillu ilisimatitsivoq Avanersuarmi piniartut aalisartullu tapiiffigineqartussat kommunip inuussutissarsiornermut immikkoortortaanut saaffiginnissinnaasut.
Ilulissani "Tasiunnga" aamma tapiissuteqarpoq
Inughuit aningaasaateqarfiata Thulefondip saniatigut Avanersuarmi piniartut aalisartullu 41-it tamarmik immikkut 1000 koruunimik Ilulissani inaarluutillit peqatigiiffiat "Tasiunnga"-mit aamma tapiissuteqarfigineqartut, taakkua siulittaasuat Thorkild Jeremiassen KNR-imut marlunngornermi decembarip 20-anni oqaluttuarpoq.
