Avannaata Kommuniani borgmesteri: Qaqqaq sisooratarsinnaasoq immikkut eqqumaffigaarput
- Ataavartumik ingerlattuarparput piareersarnerput. Uninngisaannarpoq. Uani kommuunitta iluani qaqqat aarlerinartut arlaqarmata taamaattumik upalungaarsimanerput qaffasinnerpaami inissisimajuaannarpoq pisoqarnissaanut sillimalluta.
Palle Jerimiassen oqarpoq. Taanna Avannaata Kommuniani borgmesteriuvoq.
Uummannap sulluani Kangerluarsummi qaqqanik sisoornissamik aarlerinaateqartunik nassaartoqarpoq.
Namminersorlutik Oqartussat marlunngornerup ualigaa taama nalunaaruteqarput.
Qaqqap sisoorsinnaanera qaqugu pissanersoq oqaatigineqarsinnaanngilaq. Aqaguusinnaavoq ukiulluunniit 200-t qaangiuppata.
Qaaqqarli sisooriataassagaluarpat Ukkusissanut, Niaqornanut Qaarsunnullu kingunerluuteqangaatsiarsinnaasoq ujarassiuut GEUS-imeersut nalilerpaat.
Uummannap sulluani qaqqat sisoornissamik aarlerinaateqartut nutaat sumiissusaat assimi matumani takutinneqarput:
Paasisat kingulliit aallaavigalugit upalungaarsimanermut pilersaarut nutarteritsik Avannaata Kommuniata borgmesteriata attaviitsup Palle Jerimiassenip paasissutissiissutigaa.
Assersuutigalugu nunaqarfinni najugaliinut tassaarsuaqartitsisuusaartoqassalluni.
- Ulloqeqqanut nilliasaatit nilliatinneqassapput. Aamma aasariartornerani misiliinerit pisuusaartitsinerillu ingerlateqqinneqassapput. Oqaatigisinnaanngilara ulloq sunarpiaanersoq kisianni piareersaatit tamakku tamaasa ingerlappagut, Palle Jeremiassen oqarpoq.
Qaqqat sisoornissamik aarlerinartut sisamat
Karrat Kangerluanni qaqqap ilaa immamut 2017-imi juunip ulluisa 17-ianni sisoormat, 90 miiterisut portussusilinnik malissuarpoq.
Nuugaatsiaq sakkortunerpaamik eqqorneqarpoq, illullu aqqanillit amuneqarlutik. Inuit sisamat maqaasineqartutut nalunaarutigineqarput, ajunaarsimasutullu kingusinnerusukkut nalilerneqarlutik. Nassaarineqarnikuunngillat.
Nuugaatsiami Illorsuarnilu innuttaasut qimagussorneqarput, nunaqarfiillu matuneqarlutik. Nunaqarfinniit qimagussorneqartut amerlasuut Uummannami ullumi najugaqarput.
Oqartussat Kalaallit Nunaanneersut, Danmark Norgemeersullu ilisimasallit suleqatigalugit qaqqat sisoornissamik aarlerinaateqartut nakkutigisaraat. Karrat Kangerluani qaqqat sisoornissamik arlerinaatillit pingasut nalunaarusiami siorna saqqummersinneqartumi atuarneqarsinnaapput.
Tassaarsuaqarneranut takussutissat nalinginnaasut
Sumiiffinni tamani tassaarsuartoqarneranik aarlerisaarisoqartillugu aarlerisaarinerit ilumoorunneqartassapput. Tassaarsuaq sineriammut apuuppat imaq nalinginnaasumit tininnerujussuussaaq imaluunniit imaq annertoorujussuarmik ulissaaq.
Soorluttaaq taamatut pisoqarnerani qimmit eqqissiveerussinnaasartut. Taamatut aarlerinartumik malussarniaraanni piaartumik sissaq qimanneqartariaqarpoq. Nalinginnaasumik sissamit qummut qatsissumukarlutit ingerlasassaatit. Meterit qullarterfitit tamaasa annassutigisinnaavatit.
Paasissutissarsiffik: Namminersorlutik Oqartussat
Tassalu Uummannap sulluani maanna aamma allanik nassaartoqaqqippoq.
2017-imi tassaarsuaqarnera kingorna Uummannap eqqaani najugallit tassaarsuaqaqqissagaluarpat sillimaniarnikkut arlalinnik piareersaaffigineqarput.
Borgmesteri taama nassuiaavoq:
- Qimaaffiusinnaasut, tummeqqat, containerit qimaaffissat, qipiit, ikumasartut nerinermullu atortut tamakkua tamaasa sillimaffigalugit piareersarfigereernikuuagut. Aamma pisuusaartitsinerit ingerlannikuuagut aamma maanna pilersaarusiorneqarput pisusaartitsinerit ingerlanneqaqqissasut, Palle Jerimiassen oqarpoq.
Nuunnissaq periarfissaasoq
Tassaarsuaqassagaluarpat eqqugaasinnaasuni najugallit 176-it nuukkusuppata oqartussanit ikiorneqarnissaannik neqeroorfigineqarnikuupput.
Neqeroorullu suli atuuttoq borgmesteri oqarpoq:00:04:13
- Neqeroorut Uummannap sulluani najugalinnut innuttaasunut tamanut atuunnikuuvoq aamma suli atuuppoq. Aamma taanna nuussinnaanissamut neqeroorut piumassuseq aallaavigalugu Namminersorlutik Oqartussaninngaanniit erseqqissaasoqartussaavoq neqeroorut suli taanna atuuttoq, Palle Jerimiassen oqarpoq.00:00:23
Norges Geotekniske Institut paasissutissat nutaat misissuleruttorpai. Suliassaq annertuumik pingaartikkaat aammalu 2022-mi maajip naalernerani tassaarsuaqarneranut pisuusaartitsineq eqqoqqissaarnerusoq naammassissallugu naatsorsuutigalugu Namminersorlutik Oqartussat allapput, Palle Jeremiassen.
Tassaarsuaqangajalersinnaaneranut ersiutit maluginiagassat
Upalungaarsimanermut Ataatsimiititaliarsuup paasissutissat nutaat pillugit inassuteqarpoq, taakkulu Naalakkersuisut malinniarlugit aalajangerput:
- Paasissutissat nutaat tamanut saqqummiunneqassasut
- Sumiiffinni kalluarneqartussani nilliasaatit ingerlalluarnersut misissorneqassasoq
- Avannaata Kommuniata, Peqqinnissaqarfiup, Nukissiorfiit, Tusass allallu upalungaarsimanermut pilersaarutiminni tassaarsuaqarnissaata aarlerinaateqarnera sillimaffigissallugu qulakkiissagaat.
- Tassaarsuaqangajalersinnaaneranut ersiutaagajuttut pillugit innuttaasut eqqaasissutigineqassasut.
- Avannaata Kommuniata sumiiffinni kalluarneqartussani suli pigaartoqarnissaa qulakkiissagaa inassutigineqarpoq.
- Sumiiffik nutaaq taanna misissueqqissaarnerni Karrat kangerluani alapernaarsueriaatsimik ilimasaarutinillu pilersitsinissamut tunngatillugu aallartinneqartuni ilanngunneqassasoq, aammalu sulineq sapinngisamik annertunerpaamik tuaviuunneqassasoq.
Ujarassiuut misissuinerisa takutippaat qaqqaq allamik qajannartortaqartoq ukiut qulit kingulliit ingerlaneranni sukkasoorujussuarmik sukkatsikkiartortumillu ajorsiartorsimasoq. Qaqqami sumiiffik alla taanna pillugu paasissutissanut aallaavigineqarput satellitsikkut paasissutissat, innani assilisat kiisalu ornigulluni misissuinerit misissoqqissaarneqarsimasut takutippaat.
