Avannaata Qimussersuanngortoq nuannaarnerup pianik qullilisoq

Ukioq manna Avannaata Qimussersuanngortoq Saattuneersoq oqaluttuarpoq Uummannap kangerluata kingusissukkut sikunerata malitsigisaanik sukkaniunnissamut sungiusarnertik periarfissaloqqaarsimasoq. Taamaakkaluartoq januarimi aput nakkarniariartoq qimoriarsaanini ingerlatilersimallugit oqaluttuarpoq.

Apuukkiartornermini misigissutsimigut aalassappoq

Nunaqarfik Saattut qeqertamiippoq 3 km. x 1 km.-isut angitingisumi. Taamaattoq sikunissaata tungaanut qeqertannguami tassani illerngit utikaajaarlugit ullut tamaasa qimoriarsaasarsimalluni Anthon Street oqarpoq.

- Meeraaninniilli ilakka qimmussertuupput, uangalu tamanna ingerlatiinnarsimavara. 1999-mi unammisunut peqataaqqaarpunga, massakkullu qulit sinnerlugit peqataareersimalerpunga. Ukiut ingerlanerini sukkaniunnissamut sungiusartarninni ilaatigut eqqarsalertarsimavunga asuli nukimmik atuilussinnarlunga.

- Qimoriarsaasarninni ilaatigut qulalertarsimanera meeraaninnilu qimussertarninni misigisarsimasakka kiisalu ilaquttakka tapersersortikkalu Avannaata Qimussersuanngussutissannik apuutiliivinninni  tamakku tamaasa ataatsikkoortillugit qaffattoorutigaakka apuunninnilu qullilissutingalugit, Anthon Street Avannaata Qimussersuanngortoq oqaluttuarpoq.

Tukuma pissartanngoqatigigaa

Anthon Streetip Avannaata Qimussersuanngornerminut atatillugu ningioqunni Tukuma, maannakkut qimuttumini utoqqaanersanngortoq, nuannaralugu eqqaavaa. Taanna nutaraasoq qimuttoreqqaarnerani paasisimavaa qimullaqqittorujussuusoq, qimussereerlunilu apuukkami ilaminut nersualaarutigisimavaa qimmini taanna qimussinnaatillugu pinngitsoornani normu 1-inngornissani kissaatigalugu. Maannalu Anthon Streetip oqaasii piviusunngorput:

- Apuukkiartortussanngorluta siullinngorlungalu oqaatigisimasakka puttarseqqippakka, Tukumalu Avannaata Qimussersuanut immaqa naggataartoq oqaatigisimasara angoqaarput. Oqaatigisimasat suulluunniit kissaatigalugit piviusunngortartut imaallaat aamma paasivara.

Qimussersuanngornini upperiuminaatseqqaaraa

Unammiffiup aqqutaata ilarujussua siuttumut tullersortaareerluni qaangerlugu apuuffissaq nuillugulu qanillilivinneranut ilumut normu 1-nngortussanngorluni takusinnaalereerlugu upperiuminaatsissimallugu Anthon Street oqaluttuarpoq, apuutereernermilu kingorna aatsaat ilaquttaminit ikinngutiminillu sianerfigiteqattaarnermini Qimussersuanngornini isertilluarsinnaanerulersimavaa.

- Sinnattuaqinarpoq, soorluli aamma ikiarsikujuinnarluni - taamatut misigivara. Avannaata Qimussersuanngornera kammappassuarma ilaquttammalu mobilikkut tutsiuttaarnerini arriitsunnguamik uppernarsiartuaarpara.

Saattuniit Qasigiannguanut ullut pingasut ingerlaartut

Uummannap kangerluaniit unammiat, inuit katillutik 18-it snescooterinik qimmit karsiniittut qamutillu sukkaniuussutissat kalillugit, 14. marts Nuussuup ituinnerani silamik akornuteqarlutik illuaqqami unnuisariaqarsimapput aqaguanilu aatsaat Qeqertamut ingerlaqqissinnaasimallutik. Anthonip illuaqqumut unnuiffigisaminnut apuunnertik ulorianartorsiornarnerarpaa.

- Unnukkut qulinngulersoq illuaqqamut pivugut persersuaq ersittoqanngitsoq ulorianartorsiorluta. Qujanartumik orsussalisarama petruuliu 10 literi, taanna illuaqqamiinnitsinni kialaarutingaarput, aamma issinnermik.

Unammiat aqaguani unnulersukkut Qeqertamiit umiarsuaaqqamut ilaallutik aallarput, 16 tiimillu ingerlareerlutik Qasigiannguanut 16. marts apuullutik.

Angusaminut tulluusimaarpoq

Ataasinngornermi unammersuareernerup kingorna suli Qasigiannguaniillutik Anthon Street oqaluttuarpoq, angerlamullu saannissartik kisiat utaqqiinnalerlugu.

- Maannakkut qimmikka tamaasa oqquteqqissuakka, siullermik maaniikkatta (Qasigiannguani) ataaseq tammarnikuungakku. Soorunami tulluusimaarpunga aamma Avannaata Qimussersuanngortartut siulii allat nuannaartorisaqingakkit. Utimut apuunnissaq erininartorujussuuvoq, Anthon Street Avannaaata Qimussersuanngortoq Saattuneersoq oqaluttuarpoq.