Biilertoq igalaamini aputeqarnini pissutigalugu nutaamik misilitsissallunilu akiligassinneqartoq

Naak biilit aputaajarnissaat piffissamik atuiffiullunilu assaarsinartaraluartoq tamanna akilersinnaavoq. Tassami biilersinnaanermut allagartaqaannarnissaq akiligassitsinnginnissarlu qulakkeerniaraanni taamaaliortariaqarpoq.

Tamanna angutip Nuummeersup biilimi igalaartai talerperliit aputeqartut biilimik ingerlatsigami ilikkagaqarfigaa. Tamannami pissutigalugu 1500 koruuninik akiligassinneqarpoq, biilinillu ingerlatsinermi inatsisinik ukiut pingasut ingerlanerani unioqqutitseqqikkuni biilinik ingerlatsisinnaajunnaarsinneqarluni.

Kalaallit Nunaanni Politiit tusagassiuutinut nalunaarummi allapput. Nunatta eqqartuussisuuneqarfiata eqqartuussisoqarfiup aalajangerneratut tamanna sisamanngormat aalajangerpaa.

AAMMA ATUARUK Aputeqangaatsiarneranik aamma illit ilungersorpit? Nuummi 64 centimeterimik ippassaq apivoq

Unnerluussisussaatitaasut tamanna ilorrisimaarutigaat:

- Biilertut ilaat biiliminnik isikkivimminnik qulakkeerisimanatik akiligassitsikkaangamik biilinillu ingerlatsisinnaajunnaarsinneqaraangamik uissuummertarput, Kalaallit Nunaanni Politiit unnerluusisussaatitaasuat, Nina Jessen oqarpoq.

- Biiliniilli isikkivilunneq angallannermi ajutoornermik toqqaannartumik kinguneqarsinnaavoq, tamannalu iliuusereriikkamut kinguneqaataasinnaavoq, tusagassiuutinut nalunaarummi allappoq.

Biilersinnaanermut pisinnaatitaaffiiarneqaraanni biilersinnaanermut atuagarsornikkut ingerlatsitsinermillu misilitsittoqaqqissaaq. Taamaaliunngikkaanni misilitsinnermilu angusinngikkaanni ingerlatseqqusaajunnaartoqartarpoq.

Angallannermut inatsimmik ukiut pingasut ingerlaneranni unioqqutitseqqikkaani sivikinnerpaamik qaammatini arfinilinni biilersinnaajunnaartoqarsinnaavoq.