Biskopiusimasup Desmond Tutu pillugu: Inutsialassuaq itisuumik eqqarsarsinnaasoq
- Silarsuarmiunut tunniussaqarpoq, akaareqatigiilluta inooqatigiinnissatsinnut sorsuutiginittuuvoq, Sofie Petersen taama oqarpoq.
Nunatsinni biskopiusimasup Sofie Petersenip Sydafrikami inuit pisinnaatitaaffiinik sorsuutiginittoq biskopiunerusorlu Desmond Tutu taama eqqaamavaa. Tutu 90-nik ukioqarluni ullumi toquvoq
AAMMA ATUARUK Sydafrikami biskopiuneq Desmond Tutu toquvoq
Sofie Petersen nunatsini ukiuni 25-ni biskopitut sulivoq, 1995-mit 2020-ip tungaanut. Biskopiunermini Sydafrikami biskopiuneq Desmond Tutu Danmarkimi Norgemilu naapippaa.
Kalaallit Nunaannut qaaqqusaagaluarpoq.
- Inutsialassuaq, pissaanermik peqarpoq, anersaalik itisoorujussuarmik eqqarsarsinnaasoq, aammali inuk illarumatooq, quujanartunut aamma saatitsillaqqissoq, soorlu assersuutigalugu sammisani itisoorujussuugaluartuni artornarsinnaagaluartuni, quujanartunut saatitsisarpoq, immaqa taamaalilluni iijuminarsarlugit oqaasissani,
Sofie Petersenip uani oqaluttuaraa, Desmond Tutu biskopitut sulinermini anersaaqarluartuusoq pissaanilik taamaatorli quujanartunut qanittoq :
- Inutsialassuartut inuppassuarnullu aqqutissiuisutut eqqaamassavara, Sofie Petersen oqarpoq
Desmond Tutu Kalaallit Nunaannut tikeraarsinnaanersoq aperineqarpoq
- Kalaallit Nunaannut aamma tunniussaqarsinnaammat aperigaluarakku Kalaallit Nunaannukarusunnersoq, taava uulikulaariarluni oqarpoq, naa...qiianarpallaaarpoq, tassa Desmond Tutup ilisimavaa Kalaalllit Nunaani qiianarsinnaasoq, biskopiusimasoq Sofie Petersen taama oqarpoq.
