Brugseni neqit akitsuutaarunneranni: Pisisartut malugissaneraat qularnarpoq
Pisiniarfinni, unnukkorsiutissanik niuerniarnermi, neqit toqqagassat amerlanerpaartaat nunatta avataanit eqqussugaasarput. Taakkua eqqussornerannut maannamut akitsuuteqarput. Akitsutilli Naalakkersuisut atorunnaarsissagaat, Inatsisartut aalajangerput. Savat savaaqqallu neqaat taakkununnga ilaanngillat.
Demokraatit siulittaasuat, Jens-Frederik Nielsen, siunnersuuteqartuuvoq. Taassuma soorlu nersussuit neqaat aserortikkat pisisartumut kilomut koruuninik qulinik akikinnerulersinnaanerat naatsorsuutigaa.
AAMMA ATUARUK Demokraatit: Neqinut akitsuutit peerneqarlik
Qinikkalli eqqussuinermut akitsuutinik atorunnaarsitsigaluarlutik pisiniarfinni akinik aalajangersarsinnaanngillat.
Kalaallit Nunaanni Brugsenimi tuniniaanermut pisortap, KNR-mut oqarnera naapertorlugu, nersussuit neqaat aserortikkat nioqqutissaatitik tamarluinnangajammik Danmarkimit eqqussorneqarput.
Pisisartumut akikinnerulernissaat qulakkeerneqanngitsoq
Nunarsuarmi niuerneq aningaasap naleerukkaluttuinnarneranit tatisimaneqaqimmat, Inatsisartut aalajangigaat Brugsenip pisisartuinit malugineqassanersoq suli qularnarpoq.
- Nersussuit neqaasa aserortikkat pisiatta 99,9 procentii Danmarkimeersuupput. Taamaattumik nioqqutinut taakkununnga Danmarkimi akit apeqqutaalluinnassapput, Jes Nyborg oqarpoq.
Tassa Brugsenip nioqqutissanik pisiniarfigisartagaasa akigititaat nunatsinni pisisartut akikinnerusumik neqisisinnaalernissaannut aalajangiisuussapput.
Akitsuutaaruttut akikillivallaanngitsut
Tuniniaanermut pisortap kaffit assersuutigai. Kaffit eqqussornerat ukioq mannamit aamma akitsutaarukkaluarpoq. Nioqqutissanilli pisiniarfigisartakkat akitsuipput. Taamaalilluni kaffit eqqussornerat akitsuutaarukkaluartoq pisisartunut sipaarutaavallaanngitsoq, Jes Nyborg oqarpoq.
AAMMA ATUARUK Siumut: Kaffit tiit timmiaatillu nerisassiat akitsuuteqaqqilerlik
Nersussuilli neqaat niuerfinni akitsunngippata soorlu Brugsenimi pisisartut nuannaarutissaqarsinnaapput.
- Pisiareqqaarnerani aki taamaaginnarpat akitsuullu atorunnaarpat taava pisisartunut akikinnerusumik tuniniaanissatsinnut pissutissaqarluarpugut, Jes Nyborg oqarpoq.
Suli aningaasaliinngitsut
Neqit eqqussornerinut akitsuutinik atorunnaarsitsineq nunap karsiata 13,3 millioninik ukiumut annaasaqaatigissagaa naatsorsuutaavoq.
Taanna qanoq aningaasalersorneqassanersoq suli ilisimaneqanngilaq. Aningaasanut inatsisissamut isumaqatigiinniarnermi tamanna eqqaasissutigineqassasoq, aningaasaqarnermut naalakkersuisoq, Naaja H. Nathanielsen Inatsisartunut oqarpoq.
