Siumut: Kaffit tiit timmiaatillu nerisassiat akitsuuteqaqqilerlik

Aningaasanut ukioq mannamut inatsit siorna isumaqatigiissutigineqarmat kaffit, tiit timmiaatinillu nerisassiat eqqussuunneri ukioq manna akitsuuteqassanngitsut isumaqatigiissutaavoq.

Inuit Ataqatigiit, Naleraq, Demokraatit Atassullu taamani taama atsioqatigiipput.

AAMMA ATUARUK Partiit sisamat aningaasanut inatsit pillugu isumaqatigiittut

Tamanna kilop affaanik kaffisinermi koruuninik pingasunik pisisartumut sipaarutaavoq.

Eqqussuinermut akitsuutinik atorunnaarsitsigallarneq ukioq mannamuinnaq atuuppoq. Atorunnaarsitsineq ataavartunngortikkusullugu aningaasaqarnermut naalakkersuisoq, Naaja H. Nathanielsen, Inatsisartunut inatsisissatut siunnersuuteqarpoq.

Siumut: Piariikkat akitsuuteqaqqissapput

Siunnersuut Inatsisartuni marlunngornermi oqallisigineqarmat atorunnaarsitsigallarnermut atsioqataanngitsut, maannakkulli naalakkersuisoqataasut, Siumukkut, oqaaseqartuata siunnersuut isumassarsiatsialaatinngilaa.

- Suliarineqareersimappata eqqussat akitsuuteqarlik, nunatsinni pilersitat illersorumallugit, Kuno Fencker Inatsisartut oqaluttarfiannit oqarpoq.

Tassalu assersuutigalugu Araba Kaffit eqqussuunnerat Siumup aappaagumiit akitsuuteqassasut siunnersuutigaa. Araba kaffit nunatsinni najoqqarneqarluartartut nunatsinni nioqqutissiarineqanngillat.

Kaffivik assersuutaasoq

Nuummiittulli kaffinik sikatsitassanik tikisitsisartup, Nuummilu sikatitsilluni tunisassiortartup, Kaffiviup sikatsitai, nunatsinni suliaagaamik akitsuuteqassanngitsut Siumut kissaateqarpoq.

- Massakkut takusinnaavarput kaffi sikatsitassaq nunatsinnut tikiseriarlugu sikatsitsivimmik pilersitsisoqartoq, tamannalu kaffimik sikatseqqammersumik pitsaasumik pisiassaqartitsisoq, Kuno Fencker oqarpoq.

Nioqqutissat piariikkat eqqussornerat uani pineqartoq Siumut erseqqissaavoq.

AAMMA ATUARUK Demokraatit akitsuutinik atuukkunnaarsitsinissamut siunnersuutertik tunuartikkaat

Partiip atortunik naammassineqanngitsunik tikisitseriarluni nunatta iluani nammineq pisiassanngortitsisarnerunissaq angorusuppaa.

Eqqussuinermut akitsuutinik atorunnaarsitsigallarnerup ataavartunngortinnissaanik siunnersuut aningaasaqarnermut akileraartarnermullu ataatsimiititaliamut ingerlateqqinneqarpoq.

Kaffit eqquussuunnerisa akitsuutaannik ukioq mannamut atorunnaarsitsigallarneq nunap karsiata 2 millioningajalluinnarnik ukioq manna annaasaqaatigaa.