Demokraatit akitsuutinik atuukkunnaarsitsinissamut siunnersuutertik tunuartikkaat

Demokraatit sukkunut, neqinut kaffinullu akitsuutit atuukkunnaarsinniarlugit siunnersuuteqaqqaarmata pisisartut neriullualeraluarput.

-Aap, uanga peerneqarnissaat kissaatigisorujussuuara, pissutigalugu ullutsinni isertitagut annikippallaaqaat, qaffanneqarneq ajorput, uanga qaammammusiaqarpunga, angummanniaanaq inuuvugut, Marie Petersen KNR-imut qaammat kingulleq oqarpoq.

Pisiassalli akikillinissaasa piviusunngornissaat suli ungasippoq.

Demokraatimmi akitsuutinik atuukkunnaarsitsinissamut siunnersuutertik Inatsisartuni ippassaq aappassaaneerneqartussaagaluartoq tunuartippaat.

Akitsuutit aporaaffioqisut Siumukkut naalakkersuisuutitaqarnerisa nalaanni 2019-imi atuutilerput.

Tiinut, kaffinut, sukkunit, neqinut, lakridsinut sukkulaatinullu akitsuutit maanna pineqarput.

Inuiaqatigiit peqqinnerulernissaat siunertaralugu 2019-imi Naalakkersuisut akitsuusersuipput. Tamannali iluatsinngitsoq pisiniarfiit tunisaasa nikeriarsimanngitsut pisiniarfiit arlallit KNR-imut paasissutissiissutigaat.

Demokraatit akitsuutinik piiaanissamut siunnersuuteqarnermi tunuartitsinertik peqqutissaqarluartoq siulittaasuat oqarpoq.

- Inatsisartut partiivi amerlanerussuteqartut akitsuutit piiarnissaat akuerisinnaanngilaat. Naalakkersuisooqatigiilli neriorsuutigivaat (akileraartarnermut aaqq.) aaqqissuusseqqinnissamut ilineqarumaartut. Taannalu utaqqimaaqqaarnissaa pingaaruteqartoq isumaqarpunga, Jens-Frederik Nielsen oqarpoq.

Demokraatit akitsuutinik atuukkunnaarsitsinissamut siunnersuutertik tunuartinnagu taasissutigineqarsimagaluarpat siullermeerneqarneratut itigartitsissutigineqarsimanissaa ilimagaat.

Taamaammat siunnersuut taakkua tunuartippaat. Siunnersuummi itigartitsissutigineqarsimappat tassunga assigisumik qinigaaffiup ingerlanerani siunnersuuteqaqqissinnaanngillat.

Demokraatilli tuniutiinnarnianngillat. Taakku Naalakkersuisut akileraartarnermut akitsuutinullu aaqqissuusseqqinnissamut suliaat takoqqaarusuppaat.

- Demokraatiniit suli anguniartuassavarput inuuniarneq akikinneq. Tassanilu akitsuutinut tunngasoq qitiulluinnarpoq. Kisianni maannakkut tamakkiisumik ilalerneqannginneri allatut suliarineqarnissaanik pisariaqartitsinermik takutitsivoq, Demokraatit siulittaasuat Jens-Frederik Nielsen oqarpoq.

Demokraatit akitsuutinut allannguutissatut siunnersuutaat Naalakkersuisut misissuiffigissagaat Aningaasaqarnermut ataatsimiititaliami amerlanerussuteqartut aalajangiiffigaat.